Польская амбасада ў Лёндане выказала глыбокую занепакоенасьць у сувязі з усплёскам ксэнафобіі, ад якога, па дадзеных дыпляматычнага прадстаўніцтва, пацярпелі ў тым ліку прадстаўнікі польскай абшчыны ў Брытаніі.
«Мы шакаваныя і глыбока занепакоеныя нядаўнімі злачынствамі на глебе ксэнафобіі супраць польскай абшчыны і іншых жыхароў Вялікабрытаніі, якія прыбылі зь іншых краін», — гаворыцца ў заяве дыпмісіі, апублікаванай у «Твітэры».
У прыватнасьці, у нядзелю абразьлівыя графіці зьявіліся на ўваходзе ў Польскую сацыяльную і культурную асацыяцыю, разьмешчаную на захадзе Лёндана.
Акрамя таго, паліцыя ў графстве Кэмбрыджшір расьсьледуе паведамленьні аб тым, што ў пятніцу адразу пасьля абвяшчэньня вынікаў рэфэрэндуму ў паштовыя скрыні жыхароў Гантынгдану былі кінутыя пасланьні са словамі «канец польскаму шкодніцтву».
Многія інцыдэнты, як піша Guardian, зьвязаныя з памылковым тлумачэньнем вынікаў рэфэрэндуму. Некаторыя лічаць, што цяпер жыхарам ЭЗ без брытанскага падданства прыйдзецца пакінуць краіну.
