Акцыю Пятра Паўленскага «Пагроза» вылучылі на прэмію ФСБ

Каардынатар праваабарончага праекта арганізацыі «Адкрытая Расея» Марыя Баронава вылучыла акцыю мастака Пятра Паўленскага на прэмію ФСБ Расеі, якая штогод уручаецца «за лепшыя творы літаратуры і мастацтва аб дзейнасьці органаў фэдэральнай службы бясьпекі».

Падчас акцыі «Пагроза» Паўленскі ў лістападзе летась падпаліў дзьверы будынка ФСБ у Маскве на Лубянцы. Як напісала Баронава у фэйсбуку, у выніку дзеяньняў Паўленскага «дзьверы набылі значна большую мастацкую каштоўнасьць, стаўшы творам манумэнтальнага мастацтва, годным найвышэйшай ацэнкі аргкамітэту прэміі ФСБ».

Пётр Паўленскі адразу пасьля сваёй акцыі быў затрыманы і затым зьмешчаны пад варту. Цяпер ён знаходзіцца ў СІЗА, яго абвінавачваюць у пашкоджаньні аб’екта культурнай спадчыны. На мінулым тыдні за яго мастацкія акцыі арганізацыя Human Rights Foundation прысудзіла яму міжнародную прэмію Вацлава Гаўла, якую Паўленскі распарадзіўся перадаць так званым «прыморскім партызанам».

Конкурс на лепшы твор аб дзейнасьці органаў ФСБ праводзіцца з 2006 году. Яго арганізатары падкрэсьліваюць пераемнасьць з прэміяй КДБ СССР, якая існавала ў савецкія часы, і называюць адраджэньне конкурсу «чарговым крокам ведамства ў рэалізацыі палітыкі „разумнай адкрытасьці“, разьвіцьця і ўмацаваньня сувязяў з грамадзянскай супольнасьцю». Згодна з Палажэньнем аб конкурсе, вылучаць творы на прэмію могуць ня толькі грамадзкія арганізацыі, але і фізычныя асобы.