Саміт праводзіцца па ініцыятыве генэральнага сакратара ААН Пан Гі Муна. Як адзначаюць прадстаўнікі ААН, гэты форум павінен паслужыць своесаблівым «сыгналам да дзеяньняў у імя агульначалавечых каштоўнасьцяў».
Сярод іншых у саміце будуць прымаць удзел канцлер Нямеччыны Ангела Мэркель, прэзыдэнт Украіны Пятро Парашэнка і прэзыдэнт Турэччыны Рэджэп Эрдаган. У складзе ўкраінскай дэлегацыі ў саміце прыме ўдзел упаўнаважаны прэзыдэнта Ўкраіны па справах крымскататарскага народу Мустафа Джамілеў.
Аляксандар Лукашэнка ў Стамбул не паехаў. Як паведаміў Свабодзе прэсавы сакратар беларускага МЗС Дзьмітры Мірончык, Беларусь будзе прадстаўлена на саміце генэральным консулам у Стамбуле Ігарам Белым. «Гэты саміт несумненна цікавы, гэта першы такі глябальны форум, і мы вельмі ўважліва адсочваем, што там будзе адбывацца. А гэтую задачу можа выканаць і генэральны консул», — сказаў Мірончык, адказваючы на пытаньне, чаму Беларусь у Стамбуле не будзе прадстаўлена на ўзроўні кіраўніка дзяржавы ці ўраду.
Прэзыдэнт Расеі Ўладзімер Пуцін таксама на саміт у Стамбул не паедзе. Міжведамасную дэлегацыю РФ на форуме ў Стамбуле ўзначаліць намесьнік кіраўніка МНС Сяргей Воранаў.