Сёньня ў Цэнтральным раённым судзе Менску праходзяць працэсы над удзельнікамі пікетаў каля расейскай амбасады ў падтрымку Надзеі Саўчанкі, асуджанай у Расеі на 22 гады турмы.
На лаўцы падсудных каля 10 чалавек.
Калі пачалі судзіць барда Зьмітра Захарэвіча, ён хадайнічаў, каб працэс вёўся па-беларуску, але судзьдзя Тацяна Рак хадайніцтва не задаволіла.
З перапытваньняў судзьдзі стала зразумела, што яна ня ўсё разумее па-беларуску, але два словы на роднай мове Захарэвічу сказала: «Не дазваляю». Зьміцер Захарэвіч ня лічыць сябе вінаватым, хаця не адмаўляе, што браў удзел у пікеце ў абарону Саўчанкі.
Раней актывіст Яўген Батура, якога пачалі судзіць сярод першых, заявіў суду, што 9 сакавіка скарыстаўся сваім правам на вольнае выказваньне меркаваньняў, а таксама яго натхнілі словы Сьвятланы Алексіевіч, якая падтрымала Саўчанку. Адметна, што судзьдзя Іван Майсейчык, які судзіць Яўгена Батуру, на патрабаваньне актывіста правёў працэс цалкам па-беларуску.
