22 сьнежня а 18-й гадзіне ў менскай кнігарні «Галіяфы» адкрыецца выстава да 30-годзьдзя «Талакі».
Арганізатар выставы Цэнтар дасьледаваньняў грамадзянскай супольнасьці Беларусі прадставіць на ёй 100 фотаздымкаў Уладзімера Сапагова. На вечарыне, прымеркаванай да адкрыцьця выставы, выступяць удзельнікі гістарычных падзеяў і сябры фатографа.
Кіраўніца Цэнтру дасьледаваньняў грамадзянскай супольнасьці Беларусі Паліна Сьцепаненка апавяла карэспандэнту Свабоды пра мэты выставы:
«Мы хочам актуалізаваць праблему страчаных архіваў, бо Сапагоў быў фоталетапісцам нацыянальна-арыентаваных моладзевых рухаў 80-х гадоў. Вельмі важна, што гэты год — юбілейны для найбольш масавага моладзевага аб’яднаньня і яшчэ сёлета споўнілася 50 гадоў Сяргею Вітушку, памяць пра якога мы хацелі б ушанаваць падчас гэтай імпрэзы. Бо там шмат фотаздымкаў народных сьвятаў зь ягоным удзелам».
Чым цікавыя фотаздымкі Ўладзімера Сапагова для сёньняшніх наведнікаў выставы?
«Яны паказваюць, якім было тады жыцьцё, нацыянальны ўздым канца 80-х — пачатку 90 —х гадоў, бо цяпер шмат змрочных мітаў, якія трэба разбураць. Сапагоў сам быў удзельнікам гэтага адраджэнскага руху і фіксаваў тое, у чым асабіста браў удзел. Гэта першая пасьмяротная выстава Сапагова, але шмат ягоных фотаздымкаў сталі ўжо хрэстаматыйнымі. Здымкі былі ўратаваныя ягоным сябрам Міхаілам Мякішам».
Ўладзімер Сапагоў — прафэсійны фатограф, нарадзіўся ў Берасьцейскай вобласьці, дзе выхоўваўся ў дзіцячым доме. Пасьля вучыўся ў Маскве, быў на будаўніцтве Байкала-Амурскай магістралі. Потым вярнуўся ў Менск, працаваў на «Беларусьфільме» і фатографам на Менскім трактарным заводзе. Памёр ён ад інсульту ў 2012 годзе, пахаваны сябрамі ў вёсцы Весьніна Лагойскага раёна.
