Лінкі ўнівэрсальнага доступу

Дырэктарка kyky.org пра блякаваньне сайту: «Мы шакаваныя. Гэта грунтуецца на паклёпе Дзіянава»


Дырэктарка заблякаванага ўладамі сайта kyky.org Дар’я Мацявіна

Дырэктарка заблякаванага ўладамі сайта kyky.org Дар’я Мацявіна

Дырэктарка заблякаванага ўладамі сайта kyky.org Дар’я Мацявіна ў інтэрвію Свабодзе заявіла, што будзе аспрэчваць несправядлівае рашэньне Мінінфарму.

— Мы дзесьці меркавалі, што такое можа здарыцца, як найгоршы сцэнар. Але спачатку павінна было быць папярэджаньне. Паводле заканадаўства пасьля двух папярэджаньняў сайт могуць заблякаваць ці закрыць. І толькі ў выключных выпадках сайт могуць закрыць без папярэджаньняў.

Мы шакаваныя тым, што адбылося, і цяпер самае галоўнае — аднавіць доступ да сайту і юрыдычна аспрэчыць гэтае рашэньне Мінінфарму.

— А ці вы ведаеце або падазраяце, што так абурыла Мінінфарм?

— Мы мяркуем, што гэта артыкул пра 9 траўня. Мінінфарму не спадабалася трактоўка гэтага сьвята нашым аўтарам. Але гэта нават ня аўтарскі матэрыял, пісаў ня наш штатны аўтар. Гэта рэпост з Фэйсбука. Аўтар нам дазволіў яго перадрукаваць. Гэта суб’ектыўнае меркаваньне аўтара, Аляксандра Кныровіча. Гэта спроба альтэрнатыўнага погляду на падзеі. А нас абвінавацілі ў гістарычным рэвізіянізьме.

Сайт kyky.org стварылі ў 2010 годзе некалькі маладых энтузіястаў — Дар’я Мацявіна, Дзьмітры Навумаў, Раман Рамановіч ды іншыя. У сакавіку 2015 сайт істотна абнавіўся, перазапусьціўся з новым дызайнам.

Цяпер у рэдакцыі 7 штатных супрацоўнікаў. Дырэктарка сайту — Дар’я Мацявіна, галоўны рэдактар — Аляксандра Раманава.

На самім сайце яны характарызуюць сваю аўдыторыю гэтак: «Нас чытаюць адукаваныя людзі з высокім узроўнем даходаў. Больш за 15% — бізнэсоўцы і топ-мэнэджэры. Чытаюць пра жыцьцё, ежу, бізнэс і сэкс, хочуць быць у курсе апошніх трэндаў Менску».

Паводле дырэктаркі сайту Дар’і Мацявінай, «наш чытач — гэта сучасны беларус, які хоча жыць у лепшай краіне, у эўрапейскай Беларусі, чалавек цікаўны, актыўны, які імкнецца штосьці зрабіць для сваёй краіны, для сваіх сяброў».

Мы ведаем, што гэта адкрыты паклёп Вячаслава Дзіянава, які падбухторваў людзей дасылаць абураныя лісты. Гэта рэакцыя «ваяўнічых ватнікаў», якія шукалі там зьнявагу. Ну, а Дзіянаў яўна працуе на пэўныя структуры, нам варожыя.

А на дэсэрт нам прыпісалі яшчэ і варожасьць да нейкіх рэлігійных канфэсіяў.

— Ці будзеце вы абараняцца, аспрэчваць рашэньне Мінінфарму?

— Канечне. Мы лічым, што гэта скрайне несправядліва. Каб без папярэджаньня... Каб даслалі нам нейкую параду — штосьці зьмяніць на сайце, прыбраць. Мы б адрэагавалі. Мы атрымлівалі інфармацыйны ліст. Але гэта ня тое. Сытуацыя цалкам абсурдная.

Паказаць камэнтары

XS
SM
MD
LG