Лінкі ўнівэрсальнага доступу

logo-print

Юры Рубцоў спыніў галадоўку, бо пакрыўдзіўся на апазыцыю


Юры Рубцоў

Юры Рубцоў

Палітвязень скардзіцца, што ягонае патрабаваньне аб эфіры для апазыцыі не падтрымала сама апазыцыя.

Палітзьняволены Юры Рубцоў, які адбывае пакараньне ў спэцкамэндатуры № 7 у вёсцы Куплін Пружанскага раёну, 1 лютага спыніў галадоўку.

Пра гэта ён сам паведаміў Свабодзе:

«Галадоўку я спыніў пасьля размовы з Уладзімерам Мацкевічам і пасьля таго, як я даведаўся, што ніводная палітычная сіла так і не падала пазоў у суд з патрабаваньнем даць ім эфір, не патрабавала гэтага ад уладаў».

Апрача патрабаваньня эфіру для апазыцыі Рубцоў патрабаваў ад уладаў працы зь сярэднім заробкам 600 даляраў, як абяцаў Аляксандар Лукашэнка.

У той жа дзень Рубцоў атрымаў папярэджаньне паводле арт. 415 КК за ўхіленьне ад адбываньня пакараньня.

«Юры Рубцоў лічыць гэта поўнай лухтой, бо як можна знаходзіцца ў месцы пакараньня і адначасова ўхіляцца ад пакараньня?

Бестэрміновую галадоўку 53-гадовы Юры Рубцоў пачаў 22 студзеня — на знак пратэсту супраць таго, што адміністрацыя спэцкамэндатуры ня можа забясьпечыць палітвязьня дэкляраваным у Беларусі сярэднім заробкам, які ў эквіваленце адпавядае 600 далярам.

Адміністрацыя камэндатуры ніяк не адрэагавала на галадоўку Юрыя Рубцова.

У кастрычніку 2014 году судзьдзя Цэнтральнага суду Менску Натальля Вайцяховіч пакарала Юрыя Рубцова паўтара гадамі «хіміі» за зьнявагу судзьдзі Кірыла Палулеха. Той судзіў актывіста вясною — пасьля акцыі «Чарнобыльскі шлях — 2014». Рубцоў быў на шэсьці ў майцы з надпісам «Лукашэнка, сыходзь!». Міліцыянты затрымалі актывіста і прывезьлі ў суд у адных штанах. Калі судзьдзя Кірыл Палулех пагадзіўся судзіць Юрыя ў такім выглядзе, той, паводле словаў судзьдзі, назваў яго «падонкам».

Касацыйную скаргу Рубцова Менскі гарадзкі суд адхіліў.

Праваабарончы цэнтар «Вясна» і Беларускі Хэльсынскі камітэт заявілі, што абмежаваньне волі Юрыя Рубцова ў папраўчай установе адкрытага тыпу дае падставы кваліфікаваць Рубцова як палітычнага вязьня.

Паказаць камэнтары

XS
SM
MD
LG