Лінкі ўнівэрсальнага доступу

Ператрус у бакінскім бюро нашага радыё


Супрацоўнікі Генэральнай пракуратуры Азэрбайджану сёньня а 10.30 паводле мясцовага часу пачалі праводзіць ператрус у бюро азэрбайджанскай рэдакцыі Радыё Свабода ў Баку.

Супрацоўнікі пракуратуры, якія прыйшлі ў суправаджэньні міліцыянтаў, заяўляюць, што ў іх ёсьць судовае рашэньне «закрыць бюро».

Галоўны рэдактар і супрэзыдэнт Радыё Свабодная Эўропа / Радыё Свабода (RFE/RL) Нэнад Пэіч выступіў з заявай.

"Ператрус у нашым бюро ў Баку зьяўляецца грубым парушэньнем усіх міжнародных забавязаньняў і стандартаў, якія Азэрбайджан абавязаўся выконваць. Пастанова суду паступіла зьверху як помста за нашыя рэпартажы і як бандыцкая спроба прымусіць Радыё Свабода замаўчаць. Гэта ня першы раз, калі рэжым намагаецца змусіць нас замаўчаць, і мы будзем працягваць нашую працу, каб падтрымаць права азэрбайджанцаў на свабодны доступ да інфармацыі і навінаў, у якіх маюць патрэбу слухачы і чытачы".

Кенан Аліеў, дырэктар азэрбайджанскай службы РС, кажа, што праваахоўнікі сабралі 20 супрацоўнікаў бюро ў адным пакоі і запатрабавалі доступу да дакумэнтаў і асабістых тэчак журналістаў у сэйфе.

Супрацоўнікі пракуратуры заяўляюць, што пастанова суду зьвязаная з працягам расьсьледаваньня азэрбайджанскай службы Радыё Свабода як СМІ, які фінансуецца з-за мяжы.

Азэрбайджанскія пракуроры зладзілі падобныя рэйды ў апошнія месяцы ў дачыненьні да іншых арганізацый, якія фінансуюцца з-за мяжы, у тым ліку арганізацыі грамадзянскай супольнасьці IREX і Нацыянальнага дэмакратычнага інстытуту.

Абедзьве згаданыя арганізацыі былі ў выніку закрытыя.

Некалькі тыдняў таму азэрбайджанскія ўлады ўзялі пад арышт Хадзіджу Ісмаілаву – журналістку азэрбайджанскай службы РС, якая займалася расьследаваньнямі багацьця сям’і Аліевых – па абвінавачаньні «ў заахвочваньні да самагубства». Гэты арышт шырока асуджаецца як абуральная спроба прымусіць замаўчаць яшчэ адзін крытычны голас у Азэрбайджане.

Паказаць камэнтары

XS
SM
MD
LG