Як паведамляе Дзяржаўная памежная служба Ўкраіны, напярэдадні вечарам памежным нарадам «Краснадон» была выяўленая спроба трох КАМазаў праехаць ва Ўкраіну з боку Расеі па-за пунктам пропуску. Невядомыя не спыніліся на папераджальныя стрэлы. У выніку па парушальніках быў адкрыты агонь на паражэньне, але машынам удалося разьвярнуцца і зьехаць назад у Расею.
"У той жа дзень у 22.10 у аддзел памежнай службы"Станічная Луганская" пад’ехала група да 30 чалавек, узброеных аўтаматычнай зброяй, у тым ліку кулямётамі, і вылучылі ультыматум здаць зброю і вызваліць памяшканьне памежнага падразьдзяленьня", — паведамілі ў ведамстве.— Украінскія памежнікі адмовіліся здавацца і выклікалі падмацаваньне. Далей тэрарысты пачалі штурм з ужываньнем аўтаматаў, кулямётаў, гранатамёта і ручных гранат. Спроба захапіць памежнае падразьдзяленьне была адбітая".
У гадзіну ночы пачаўся другі штурм з ужываньнем цяжкай аўтаматычнай зброі і падствольных гранатамётаў. З бліжэйшых дамоў пачалі страляць снайпэры. Атаку зноў адбілі. Каля 2.00 баевікі распачалі трэцюю няўдалую спробу захапіць аддзел памежнай службы.
Памежнікам атрымалася зьнішчыць дзьве агнявыя кропкі снайпэраў і дарожны каток, якім нападнікі спрабавалі праламаць вароты на тэрыторыю падразьдзяленьня. Сярод памежнікаў ёсьць параненыя і кантужаныя.