Лінкі ўнівэрсальнага доступу

Менскі гарадзкі суд не задаволіў скаргу на арышт актывіста «Эўрапейскай Беларусі» Максіма Вінярскага.

Пра гэта паведаміла адвакатка актывіста Вольга Безбародкіна, якая абараняла ягоныя інтарэсы ў судзе.

«Максім Вінярскі ў скарзе, да якой я далучала сваю скаргу, указваў ня толькі на незаконны арышт, але і на іншыя істотныя моманты. Што склалася заганная практыка, калі супроць палітычных актывістаў сьведчаць толькі міліцыянты, то бок зацікаўленыя асобы. І што ідзе хваля прэвэнтыўных затрыманьняў напярэдадні важных падзеяў, як было з Максімам Вінярскім напярэдадні Чарнобыльскага шляху. Але гарадзкі суд падтрымаў рашэньне Заводзкага раённага суду і пакінуў нашы скаргі без задавальненьня».

Вольга Безбародкіна ня ведае, ці будзе Максім Вінярскі скардзіцца ў вышэйшую інстанцыю, у Вярхоўны суд. «Максім на суд не прыйшоў, бо дрэнна сябе адчувае пасьля арышту і галадоўкі. Абмяркуем гэта зь ім пазьней», — сказала адвакатка.

Максім Вінярскі быў затрыманы 22 красавіка каля крамы «Карона» і празь дзень асуджаны на 12 сутак нібыта за непадпарадкаваньне міліцыі і хуліганства. У Заводзкім судзе Максім Вінярскі запатрабаваў прагледзець відэазапісы крамы «Карона», якія б пасьведчылі, што ён не хуліганіў і не аказваў супраціву пры затрыманьні, але суд гэта рабіць адмовіўся. Паводле адваката Вольгі Безбародкінай, праглядаць відэазапісы затрыманьня адмовіўся і Менгарсуд. Пад арыштам у ізалятары на Акрэсьціна Максім Вінярскі 8 дзён трымаў сухую галадоўку пратэсту. Потым толькі піў ваду, а ежы да вызваленьня не ўжываў.
XS
SM
MD
LG