Праваабаронца Тацяна Равяка атрымала пастанову Ашмянскай мытні пра тое, што цягам 10 дзён яна павінна вывезьці за межы Беларусі 40 асобнікаў кнігі Алеся Бяляцкага «Асьвечаныя Беларушчынай».
Мытнікі сканфіскавалі кнігі ў Тацяны Равякі на пачатку ліпеня 2013-га.
Кнігу зьняволенага праваабаронцы Алеся Бяляцкага «Асьвечаныя Беларушчынай» надрукавалі ў Літве. Равяка везла асобнікі для сяброў Бяляцкага.
«Ліст з Ашмянскай мытні хітры: напісалі, што правялі паўторную экспэртызу кнігі, па выніках якой выданьне ўнесена ў пералік рэчаў, да якіх ужываецца забарона на ўвоз. Пры гэтым вынікаў самой экспэртызы не дасылаюць... Толькі пішуць пра разьдзел 1.3 Адзінага пераліку. Паглядзела я гэты разьдзел: мамачкі, там і тэрарызм, і экстрэмізм, і парнаграфія, і нацызм... Самае чалавечнае — гэта «можа нанесьці страту палітычным ці эканамічным інтарэсам дзяржаваў — сябраў Мытнага зьвязу, іх дзяржаўнай бясьпецы, здароўю і маральнасьці грамадзян». Відаць, гэта датычыць «Асьвечаных...», — напісала Тацяна Равяка на сваёй старонцы ў Фэйсбуку.
Равяка заявіла Радыё Свабода, што 8 студзеня разам з праваабаронцам Паўлам Сапелкам зьвернецца ў суд, каб аспрэчыць тое, што яна называе «рээкспартам кнігі».
Яны таксама будуць прасіць Мытны камітэт прыпыніць дзеяньне сваёй прапановы, пакуль суд будзе разглядаць справу.
Тацяна Равяка
«Орган, які ладзіў экспэртызу, — Галоўнае ўпраўленьне ідэалёгіі Гарадзенскага аблвыканкаму, — не ўпаўнаважаны праводзіць такія экспэртызы. Паводле закону аб мясцовым самакіраваньні, такімі паўнамоцтвамі яго ніхто не надзяляў», — кажа Равяка.
«Мытня павінна была папярэдзіць экспэртаў пра адказнасьць за высновы. У дадзеным выпадку нікога не папярэджвалі. Наколькі дадзеная экспэртыза мае юрыдычную моц, калі ніхто не нясе за яе адказнасьці? Я хацела паспрабаваць увесьці прызначэньне экспэртызаў у законнае рэчышча», — кажа праваабаронца.
На пераходзе «Каменны Лог» «затрымана было 43 асобнікі кнігі, а мне тут ужо пішуць, што я магу забраць сорак».
«Ёсьць думка, што кніга там карыстаецца папулярнасьцю і яе паціху разьбіраюць і чытаюць. Гэтая кніга павінна быць падручнікам. Ня варта ёй мець кляймо забароненай літаратуры, тым больш такой, якая наносіць шкоду «палітычным ці эканамічным інтарэсам дзяржаваў — сябраў Мытнага зьвязу, іх дзяржаўнай бясьпецы, здароўю і маральнасьці грамадзян», — заявіла Радыё Свабода праваабаронца Тацяна Равяка.
Кніга Алеся Бяляцкага «Асьвечаныя Беларушчынай» намінавалася на прэмію Францішка Аляхновіча.
Старшыня праваабарончага цэнтру «Вясна» Алесь Бяляцкі ў 2011 годзе быў асуджаны на 4,5 года зьняволеньня паводле абвінавачаньня ва ўтойваньні прыбыткаў з-за мяжы. Праваабаронца заявіў у судзе, што грошы ішлі на дапамогу ахвярам палітычных рэпрэсіяў. Трымаюць Бяляцкага ў бабруйскай калёніі.
