Лінкі ўнівэрсальнага доступу

ВЫШЭЙ ЗА МЕНСКУЮ ТЭЛЕВЕЖУ БУДУЦЬ ТОЛЬКІ ЗОРКІ


Ігар Карней, Менск

Можна меркаваць, што ня маючы досьведу будаўніцтва падобных высотных аб’ектаў, урад зьвернецца да замежных адмыслоўцаў? Калі сыходзіць зь лёгікі, так павінна было б здарыцца. Аднак міністар архітэктуры і будаўніцтва Генадзь Курачкін, які асабіста будзе адказваць за будаўніцтва, адназначна даў зразумець: “бацькамі” менскай тэлевежы стануць беларускія архітэктары.

Ім давядзецца перанесьці з паперы на грунт маналітны слуп вышынёй 250 мэтраў, на які, у сваю чаргу, будзе “насаджаная” 170-мэтровая мэталічная канструкцыя. І калі адразу ва ўрадзе арыентаваліся на расейскі і нямецкі праекты жалезабэтонных тэлевежаў, то ўрэшце спыніліся на такім вось “зьмешаным” варыянце.

Як удалося высьветліць, нясучую частку будзе вырабляць Маладэчанскі завод мэталаканстукцыяў; цэмэнт, арматура і фарбы таксама будуць замоўленыя ў мясцовых вытворцаў: на БМЗ ў Жлобіне, на Ваўкавыскім цэмэнтным заводзе і ў лідзкіх вытворцаў фарбы.

З замежнага досьведу ўзятая хіба толькі практыка прапіскі ў тэлевежы рэстарацыі: яе плянуюць падняць на 250 мэтраў ад паверхні зямлі. Увогуле, як сказаў адзін з чыноўнікаў міністэрства сувязі, вышэй за менскую тэлевежу будуць толькі зоркі.

Паводле Ўсясьветнай фэдэрацыі высотных збудаваньняў, калі менскую вежу ўсё ж узьвядуць, у Эўропе яна будзе саступаць Астанкінскай тэлевежы ў Маскве, вышыня якой 545 мэтраў, а ў сьвеце зойме чацьвертае месца пасьля вежы ў канадыйскім Таронта (553 мэтраў), згаданай ужо Астанкінскай вежы і вежы ў Шанхаі (кітайская вежа мае вышыню 468 мэтраў).

Ці вядома, якія выдаткі пацягне такі глябальны праект? Лічбы ўжо некалькі разоў карэктаваліся. Адразу міністар сувязі Ўладзімер Ганчарэнка казаў, што кошт праекту складзе $50 мільёнаў. Але калі я ўчора затэлефанаваў у міністэрства, то пачуў іншую суму – блізу 90 мільёнаў даляраў. Прычым, крыніцы фінансаваньня яшчэ канчаткова так і ня вызначаныя.

Выступаючы ў палаце прадстаўнікоў, Ганчарэнка выказаўся вельмі неакрэсьлена: "Нешта папросім у прэзыдэнта, штосьці ў Менгарвыканкама, тоё-сёе знойдзем у Мінсувязі, крыху дапамогуць камэрцыйныя структуры".

Але абвешчана, што замежныя інвэстыцыі прыцягвацца ня будуць. Справа ў тым, што ўпершыню пра тэлевежу загаварылі яшчэ ў сярэдзіне 1990-х, але на пошук генэральнага інвэстара, паводле Ганчарэнкі, было змарнавана 4 гады. Цяперашнім дзяржплянам на будаўніцтва вежы адведзена 34 месяцы, што ў практыцы падобных праектаў надзвычай мала. Але, паколькі справа знаходзіцца на асабістым кантролі Лукашэнкі, ударныя тэмпы будаўніцтву забясьпечаныя.

У часе такіх складаных будаўнічых работ на першае месца мусіць выносіцца пытаньне бясьпекі – асабліва з улікам безабароннасьці гмахаў падчас тэрарыстычных атакаў, як у выпадку з вежамі Ўсясьветнага гандлёвага цэнтру ў Нью-Ёрку. Стаўленьне да хмарачосаў у сьвеце зьмяняецца. Летась я пабываў у самым высокім хмарачосе ў сьвеце – “Sear’s Tower” у Чыкага. Супрацоўнікі офісаў не хавалі, што вялізны будынак заняты меней, чым на 80%: пасьля верасьня 2001-га арэндаваць паверхі на 400-мэтровай вышыні стала небясьпечна.

Але, паводле зьвестак, памеры менскага гіганту могуць яшчэ адкарэктаваць на карысьць падвышэньня. Лукашэнка ў размове з мэрам Масквы Лужковым летась сказаў: Менск нічым ня горшы за Маскву, і ўсе урбаністычныя дасягненьні цалкам кладуцца на беларускую глебу.

Мелася на ўвазе рашэньне мэрыі пабудаваць у Маскве 90 хмарачосаў ад 50 да 100 паверхаў. Зь іншага боку, нідзе ў сьвеце тэлевежы такіх памераў ужо не будуюць: апроч пытаньняў бясьпекі, тут і спэцыфіка разьвіцьця сучасных камунікацыяў. Сыгнал усё часьцей дастаўляюць праз кабэль, спадарожнікі ці інтэрнэт. Усталёўваць антэны на максымальнай вышыні ад зямлі проста няма патрэбы. Гэта ж тычыцца і другога глябальнага праекту ўладаў – будаўніцтва Нацыянальнай бібліятэкі. У эру кампутарызацыі архіваў кнігасховішчы такіх памераў выглядаюць занадта эпатажна.
XS
SM
MD
LG