Уладзімер Жырыноўскі сёньня рэзка крытычна выказаўся пра абмежаваньне паставак расейскага газу ў Беларусь. Ён заявіў, што фракцыя Лібэральна-дэмакратычнай партыі зьбіраецца патрабаваць узнаўленьня паставак. Сёньня ж ЛДПР мела намер пікетаваць офіс канцэрну “Газпром”, але потым адмовілася ад гэтай ідэі.
Магчыма, гэта адбылося з-за таго, што лібэрал-дэмакраты ў сваёй заклапочанасьці апынуліся ў адзіноце. Ніводзін іншы расейскі палітык не прыняў бок кіраўніцтва Беларусі ў ягоных спрэчках з “Газпромам”. Болей за тое, сьпікер Дзяржаўнай Думы і кіраўнік прапрэзыдэнцкай партыі “Адзіная Расея” Барыс Грызлоў даў зразумець, што Дума ня будзе ніяк умешвацца ў канфлікт. Грызлоў заклікаў не драматызаваць сытуацыю. Паводле сьпікера расейскага парлямэнту, пастаўкі газу – гэта пытаньне ўзаемаадносінаў двух гаспадарчых суб’ектаў. Барыс Грызлоў заявіў: “Я мяркую, бакі знойдуць неабходнае рашэньне для таго, каб пастаўкі газу узнавіліся”.
Як вядома, “Адзіная Расея” мае ў сёньняшняй Дзярждуме большасьць месцаў. Таму можна казаць, што беларускаму боку і надалей ня варта разьлічваць на нейкую падтрымку расейскага парлямэнту, як тое было раней, калі значную частку месцаў у Дзярждуме мела камуністычная апазыцыя.
Што тычыцца “Газпрому”, то ён сёньня не выказваў ніякага імкненьня ўрэгуляваць сытуацыю. Пазыцыя кіраўніцтва расейскага канцэрну застаецца ранейшай – яно ня хоча прадаваць Беларусі газ па коштах, ніжэйшых за сусьветныя. Болей за тое, прэс-сакратар “Газпрому” Сяргей Купрыянаў сёньня перасьцярог беларускі бок ад несанкцыянаванага адбору газу з транзытных трубаправодаў. Купрыянаў заявіў: “Калі Беларусь пачне адбіраць газ, які ідзе транзытам у Польшчу і Нямеччыну, гэта будзе мець вынікам калясальны скандал міжнароднага маштабу зь непрадказальнымі для Беларусі наступствамі”. Праўда, што гэта за наступствы, прадстаўнік “Газпрому” не сказаў.
