Лінкі ўнівэрсальнага доступу

У Беларусь паступіў трэці транш крэдыту Антыкрызіснага фонду ЭўрАзЭС у памеры 440 мільёнаў даляраў.

Пра гэта агенцтву Інтэрфакс паведамілі ва ўпраўленьні інфармацыі і грамадзкіх сувязяў Нацыянальнага банку Беларусі:

«Мы пацьвярджаем паступленьне ў Беларусь трэцяга траншу крэдыту АКФ ЭўрАзЭС. Транш паступіў у поўным аб’ёме — $ 440 млн. Гэтыя сродкі залічаныя ў золатавалютныя рэзэрвы», — сказаў прадстаўнік НББ.

У чэрвені 2011 году ў разгар валютнага крызісу ў Беларусі Антыкрызісны фонд ЭўрАзЭс ухваліў выдзяленьне крэдыту ў памеры 3 мільярды даляраў дзеля стабілізацыі плацёжнага балянсу Беларусі. Цягам мінулага году на рахункі Нацыянальнага банку трыма траншамі паступілі больш за 1 мільярд 200 мільёнаў даляраў, сёлета меркавалася атрымаць яшчэ два траншы — на 880 мільёнаў даляраў. Першыя 440 мільёнаў чакаліся яшчэ ў лютым, але іх не пералічвалі, бо беларускі бок так і ня выканаў шэраг умоваў для іх атрыманьня.

Прапанаваныя фондам захады патрабуюць больш жорсткай грашова-крэдытнай і бюджэтнай палітыкі і карэкцыі ключавых прагнозных дакумэнтаў на 2012 год, якія зацьвярджаюцца ўказамі Аляксандра Лукашэнкі. Аднак беларускі бок палічыў рэкамэндацыі збольшага «лішнімі дадатковымі страховачнымі мэханізмамі».

Калізія разьвязалася пасьля візыту ў Менск 31 траўня прэзыдэнта Расеі Ўладзімера Пуціна, які выказаўся за тое, каб пералічыць Беларусі трэці транш крэдыту і пачаць перамовы адносна чацьвёртай часткі пазыкі, якую Нацыянальны банк спадзяецца залічыць на свае рахункі да канца году.
XS
SM
MD
LG