Лінкі ўнівэрсальнага доступу

logo-print

Ці паспрыяе вяртаньне паслоў вызваленьню палітвязьняў?


Амбасадары на плошчы Перамогі, 9 траўня 2011 году. Архіўнае фота

Амбасадары на плошчы Перамогі, 9 траўня 2011 году. Архіўнае фота

Кіраўніца прадстаўніцтва Эўразьвязу ў Беларусі Майра Мора аднавіла сваю працу ў Менску. Таксама ў Беларусь вярнуліся амбасадары Вугоршчыны, Літвы, Польшчы, Францыі і Швэцыі. Цягам сёньняшняга дня чакаецца прыезд амбасадараў Нямеччыны і Італіі.

Паводле прэс-сакратара МЗС Латвіі Яніса Сіліса, вяртаньне амбасадараў краін Эўразьвязу — гэта агульнае рашэньне.

«Яно каардынуецца службай ЭЗ па зьнешніх справах, і гэты працэс ужо паступова пачаўся. Ужо некаторыя паслы краін ЭЗ і прадстаўніца ЭЗ вярнуліся. Што да вяртаньня амбасадара Латвіі, то ягоны прыезд плянуецца бліжэйшым часам. Пакуль я не магу назваць канкрэтную дату. Гэта было агульнае рашэньне, але, канечне, кожная краіна і кожны амбасадар маюць свае графікі і справы. Гэтае рашэньне кожная дзяржава прымае асобна».

Пакуль яшчэ ня ўсе палітвязьні вызваленыя з турмаў, аднак амбасадары вяртаюцца. Гэта спадар Сіліс пракамэнтаваў так:

«Былі некаторыя крокі ў правільным кірунку. І мы спадзяемся, што вяртаньне амбасадараў дапаможа гэтаму пазытыўнаму пытаньню і далей».

Сёньня ж вызваленыя палітвязьні Андрэй Саньнікаў і Зьміцер Бандарэнка сустрэліся з амбасадарам Швэцыі Стэфанам Эрыксанам. Бандарэнка распавёў падрабязнасьці:

«Гэта быў невялічкі прыём у адной зь беларускіх кавярняў з нагоды ад’езду аднаго з польскіх дыпляматаў. Туды прыйшоў спадар Эрыксан. Там было шмат людзей з грамадзкіх арганізацыяў, палітычных партыяў, дыпляматаў. Гэта была звычайная размова, на прыёме. Пару словаў».

Як ставіцца Зьміцер Бандарэнка да вяртаньня амбасадараў эўрапейскіх краін у Беларусь?
Мяне ў першую чаргу цікавіць, ці будуць вызваленыя мае таварышы за кратамі.

«Вельмі прагматычна. Калі пасьля прыезду амбасадараў будуць вызваленыя беларускія палітвязьні, то буду ставіцца да гэтага пазытыўна. Калі ня будуць вызваленыя — буду ставіцца нэгатыўна, мабыць. Мяне ў першую чаргу цікавіць, ці будуць вызваленыя мае таварышы за кратамі».

Кіраўніца прадстаўніцтва Эўразьвязу ў Беларусі Майра Мора «прыступіла да выкананьня сваіх абавязкаў, уваходзіць у курс справаў», паведамілі ў прадстаўніцтве.

Сёньня чакаецца вяртаньне амбасадараў Італіі і Нямеччыны. Амбасадар Вугоршчыны Фэрэнц Контра сказаў па вяртаньні карэспандэнту «Свабоды» толькі тое, што «кансультацыі скончыліся».

Паслы Вугоршчыны, Італіі і Вялікабрытаніі ад’ехалі зь Беларусі разам са сваімі сем’ямі. Сям’я літоўскага амбасадара ў гэты час заставалася ў Менску.

Былы палітвязень Аляксандар Казулін адзначае, што без амбасадараў працаваць усё ж цяжка. Але трэба, каб была пасьлядоўная палітыка:

«Трэба нешта рабіць, і нейкае выйсьце павінна быць. Проста пытаньне такое — ці будзе нешта такое, што можа вырашыць пытаньні, якія існуюць. І самае галоўнае, каб не наступіць на тыя ж… — вы ведаеце што».

Паказаць камэнтары

XS
SM
MD
LG