Лінкі ўнівэрсальнага доступу

Партыя БНФ супраць кітайскай экспансіі ў беларускую эканоміку


«Масавае прыцягненьне ўрадам і прадпрыемствамі Беларусі зьвязаных кітайскіх крэдытаў (ужо адкрытыя крэдытныя лініі на сёньня складаюць 16 мільярдаў даляраў) ня толькі істотна павялічвае цяжар запазычанасьці нашае краіны і набліжае яе фінансавае банкруцтва», — гаворыцца ў заяве ПБНФ.

Управа Партыі БНФ выказвае «асаблівую заклапочанасьць плянамі» перадаць Кітаю 80 квадратных кілямэтраў сельскагаспадарчай і рэкрэацыйнай тэрыторыі ў Менскім і Смалявіцкім раёнах, каб пабудаваць там індустрыяльны парк.

Аўтары заявы адзначаюць, што гэта робіцца «без правядзеньня шырокага грамадзкага абмеркаваньня на прадмет высьвятленьня, якія менавіта вытворчасьці будуць там разьмешчаныя і якім чынам яны змогуць уплываць на экалягічнае становішча ў рэгіёне».

«Мы падтрымліваем справядлівае патрабаваньне чальцоў каапэратыву „Рэчанька“ аб правядзеньні адкрытых грамадзкіх слуханьняў па пытаньні стварэньня кітайскага індустрыяльнага парку ў Менскай вобласьці і заклікаем іншых грамадзянаў, чые маёмасныя ды іншыя інтарэсы могуць непасрэдна пацярпець у выніку рэалізацыі названых плянаў, падтрымаць гэтае патрабаваньне», — напісана ў звароце.

Аўтары дакумэнту таксама выступаюць супраць зьнішчэньня менскага парку імя 40-годзьдзя Кастрычніка дзеля пабудовы на яго месцы кітайскага гатэлю «Пэкін».

Паказаць камэнтары

XS
SM
MD
LG