Лінкі ўнівэрсальнага доступу

Луканін: пакаралі штрафам верніка, але ён ні ў чым не вінаваты


Судзьдзя Фрунзенскага суду Людміла Лапо прызнала верніка-баптыста Філіпа Кірдуна вінаватым і аштрафавала яго на 750 тысяч рублёў.

У сваёй пастанове Людміла Лапо адзначыла, што знаходзіць у дзеяньнях Філіпа склад адміністрацыйнага правапарушэньня, прадугледжанага артыкулам 17.1 (хуліганскія дзеяньні), калі ён «знаходзіўся ў пастарунку, парушыў дзейнасьць арганізацыі, гэта дзяржаўны орган». А таксама «аказаў супраціў супрацоўнікам міліцыі —непадпарадкаваньне». Апроч таго, у пастанове адзначаецца, што адносна Філіпа «правамерна складзеныя пратаколы аб адміністрацыйным правапарушэньні». Згодна з артыкулам 17.1 Людміла Лапо аштрафавала Філіпа на 105 тысяч рублёў, згодна з артыкулам 23.4 — на 700 тысяч рублёў. Шляхам частковага складаньня пакараньняў атрымалася канчатковая сума — 750 тысяч рублёў.

Перад вынясеньнем пастановы быў дасьледаваны журнал, у якім фіксуецца прымяненьне спэцсродкаў. Згодна зь ім, кайданкі да верніка-баптыста супрацоўнікі міліцыі прымянілі а 18 гадзіне, а не а 20-й гадзіне, то бок да таго, як яму зрабілі дактыляскапію. Філіп Кірдун таксама пацьвердзіў, што ён добраахвотна не здаваў адбіткі пальцаў.

Судзьдзя Людміла Лапо спыталася ў Філіпа, ці зразумеў ён, што абавязаны быў прайсьці дактыляскапію. Філіп сказаў, што ён не ваеннаабавязаны і мае адтэрміноўку ад вайсковай службы да 2013 году.
Ня трэба мне махаць галовамі, вельмі прашу

Судзьдзя не прыняла гэтыя тлумачэньні і нэрвова адрэагавала на рэакцыю з залі:

«Ня трэба мне махаць галовамі, вельмі прашу. Кожны пра сябе думае, робіць высновы».

Сяргей Луканін пра суд над Філіпам Кірдуном


Камэнтуючы пастанову суду, юрыст Сяргей Луканін адзначыў:

«На жаль, цуду не адбылося. Як вернік я спадзяваўся на Божы суд, што Бог зьменіць сэрца менавіта гэтай судзьдзі і яна вынесе справядлівае рашэньне. Але гэтага не адбылося. Нягледзячы на тое, што ўсе паказаньні сьведак-міліцыянтаў былі відавочна хлусьлівыя і ў гэтым былі перакананыя ўсе, хто прысутнічаў у залі суду, судзьдзя ня вынесла правасуднага рашэньня. Яна вынесла неправасуднае рашэньне. Яна пакарала хлопца, верніка штрафам, але ён быў невінаваты. Не вінаваты ні ў чым. Больш за тое, супрацоўнікі міліцыі былі вінаватыя ў крымінальным злачынстве. Яны зьдзекаваліся, чынілі гвалт над маладым вернікам. Я спадзяюся, што бацькі хлопца і сам Філіп не пакінуць гэтую справу і будуць імкнуцца абскардзіць гэтае рашэньне суду і прыцягнуць да крымінальнай адказнасьці супрацоўнікаў міліцыі. Я спадзяюся, што праўда ўрэшце пераможа».

Паказаць камэнтары

XS
SM
MD
LG