Лінкі ўнівэрсальнага доступу

Някляеў: Суд у Беларусі — аддзел Лукашэнкавай адміністрацыі


Менскі гарадзкі суд пакінуў бязь зьменаў вырак экс-кандыдату на прэзыдэнта Ўладзімеру Някляеву, а таксама кіраўніку ягонага перадвыбарчага штабу Андрэю Дзьмітрыеву, вынесены Фрунзэнскім раённым судом. Ад сёньня прысуд уступіў у сілу — Уладзімер Някляеў асуджаны на 2 гады пазбаўленьня волі з адтэрміноўкай пакараньня на 2 гады, Андрэй Дзьмітрыеў — на 2 гады пазбаўленьня волі ўмоўна з выпрабавальным тэрмінам 2 гады.

Працэс па касацыйнай скарзе Ўладзімера Някляева і Андрэя Дзьмітрыева быў хуткацечным, з абвінавачаных прыйшоў толькі спадар Някляеў, іншыя судовы працэс другой інстанцыі праігнаравалі. Не прыйшоў на суд і адвакат Някляева, паколькі ён быў заняты на іншым працэсе.

Уладзімер Някляеў адразу выступіў з адводам калегіі судзьдзяў на чале зь Сяргеем Хрыпачом:

«Па-першае, я заявіў адвод суду з той прычыны, што яны зьяўляюцца мэханічнай часткай рэпрэсіўнай машыны. Па сутнасьці, гэта аддзел Лукашэнкавай адміністрацыі. Такой судовай сыстэме ніхто ня можа давяраць. А па-другое, яны мне даслалі паведамленьне, што перадалі крымінальную справу з Фрунзэнскага суду ў гарадзкі за 4 дні да сёньняшняга суду, 18 ліпеня. 30 тамоў крымінальнай справы судзьдзям трэба было ня проста пагартаць, а ўнікнуць, каб прыняць рашэньне, а яшчэ пратаколы паседжаньняў, скаргі… Яны нават і не разгортвалі гэтую крымінальную справу, рашэньне для іх было загадзя напісанае».

Уладзімер Някляеў камэнтуе прысуд па касацыі
пачакайце

No media source currently available

0:00 0:00:52 0:00
Наўпроставы лінк


Паводле спадара Някляева, гарадзкі суд ніяк не адказаў на заявы пра парушэньні ў часе сьледзтва і суду першай інстанцыі, якія ён з адвакатамі выклаў у касацыйнай скарзе. Нягледзячы на гэта, спадар Някляеў зьбіраецца падаваць скаргу ў Вярхоўны суд і ў Камітэт ААН па правах чалавека.

Уладзімер Някляеў заявіў пасьля абвяшчэньня рашэньня гарадзкога суду, што яго зьдзіўляе ня сам вырак, а тое, што людзі, якія яго вынесьлі, згодныя працаваць часткай рэпрэсіўнай машыны:

«У гэтай сыстэме, ва ўсёй вэртыкалі, няма людзей, якія б несьлі ў сэрцах і душах тую годнасьць, якую нясуць у сваіх душах тыя людзі, якіх яны ў гэтыя турмы садзяць».

Раіса Міхайлоўская
Праваабаронца Раіса Міхайлоўская кажа, што суды другой інстанцыі па справах удзельнікаў Плошчы аднатыпныя:

«Тут я ня бачу ніякага спаборніцтва бакоў, яўна, што выносяцца загадзя падрыхтаваныя рашэньні. Судзьдзі, як мне падаецца, ня слухаюць ні довадаў адвакатаў, ні довадаў абвінавачаных, ні нават довадаў пракурораў, якія выступаюць з завучанымі фразамі».

Пракурор Артур Мірошнік у сваім выступе заявіў: довады абвінавачаных аб тым, што іх заклікі выйсьці на Плошчу 19 сьнежня былі абгрунтаваныя фактамі фальсыфікацыі выбараў прэзыдэнта, — беспадстаўныя. Паводле пракурора, гэта было пацьверджана праслухоўваньнем тэлефонных размоў пасудных, зь якіх нібыта вынікала, што тыя нічога ня ведалі пра вынікі выбараў да апошняга моманту.

Само ж праслухоўваньне тэлефонных размоў кандыдатаў на прэзыдэнта пракурор Мірошнік назваў «дапушчальным доказам».
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG