Лінкі ўнівэрсальнага доступу

Зьбітага Жукоўскага адправілі за краты


Кастусь Жукоўскі
Кастусь Жукоўскі
Судзьдзя Петрыкаўскага раённага суду Сяргей Багінскі пакараў сёньня гомельскага каардынатара стваранай партыі «Беларуская хрысьціянская дэмакратыя» Кастуся Жукоўскага 10 суткамі арышту. 5 суткамі нібыта за лаянку ў грамадзкім месцы і 5 — за супраціў міліцыі.

Супраць актывіста сьведчылі гомельскія міліцыянты Грамкоў і Аўчыньнікаў, якія акурат і спрычыніліся да зьбіцьця актывіста 17 верасьня на фэсьце «Покліч Палесься» ў вёсцы Ляскавічы Петрыкаўскага раёну.

У выніку спадар Жукоўскі трапіў у Петрыкаўскую раённую лякарню, адкуль яго праз двое з паловай сутак дачасна выпісалі, і пасьля чаго ён працягваў лячыцца амбуляторна ў Гомелі.

У суд спадар Жукоўскі прывёз выпіску з мэдычнай карты, у якім зафіксаваны сіняк на цяменна-патылічнай частцы галавы, вывіх правай рукі й удараны грудны аддзел пазваночніка.

Судзьдзя мэдычны эпікрыз да ўвагі ня ўзяў: маўляў, гэта не інваліднасьць і, наагул, зусім іншая справа. Затое прыслухаўся да словаў міліцыянтаў, якія сьведчылі, што Кастусь Жукоўскі на фэсьце лаяўся, бегаў і чапляўся да людзей, супраціўляўся міліцыі.

Дзесяць сутак адміністрацыйнага арышту Жукоўскі будзе адбываць у Петрыкаўскім райаддзеле міліцыі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG