Лінкі ўнівэрсальнага доступу

Абаронцы касьцёла будуць скардзіцца ў пракуратуру


Чарговая акцыя па абароне менскага касьцёла сьвятога Язэпа пачалася з затрыманьняў арганізатараў — Паўла Севярынца, Віталя Рымашэўскага і Кастуся Шыталя. Шараговыя актывісты усё ж правялі акцыю і заявілі пра шэраг ініцыятываў.

А 18:50 на падыходзе да касьцёлу, за які змагаюцца грамадзкія актывісты і вернікі, міліцыянты ў цывільным затрымалі сузаснавальніка Партыі БХД Паўла Севярынца, патэнцыйнага кандыдата на прэзыдэнта Віталя Рымашэўскага і Кастуся Шыталя. Актывістаў БХД сілай зацягнулі ў міліцэйскія аўтамабілі і вывезьлі з плошчы Свабоды.

«Віталю руку круцілі, ледзь не зламалі. Вазілі нас недзе кілямэтры два па розных месцах, а потым вось толькі што высадзілі на вуліцы Багдановіча», — паведаміў пасьля восьмай вечара карэспандэнту «Свабоды» Павал Севярынец.

Пазьней стала вядома, што яшчэ да сёмай вечара насупроць гатэля «Эўропа» амапаўцы затрымалі моладзевага актывіста Франка Вячорку. «Паўтатары гадзіны мяне трымалі ў мікрааўтобусе каля будынку кансэрваторыі, карыстацца мабільнікам забаранялі», — апавёў «Свабодзе» Франак Вячорка.

Таксама былі затрыманыя актывісты Мікалай Дземідзенка, Уладзімер Яроменак і Зьміцер Касьпяровіч.

Сёньня ля касьцёлу сьвятога Язэпа мусіў адбыцца роварны прабег, а таксама актывісты зьбіраліся агучыць шэраг важных заяваў. Ад велаімпрэзы давялося адмовіцца, бо міліцыянты не дапусьцілі на плошчу актывістаў на роварах.

15-гадовы Вітаўт Сіўчык: «Роварны прабег — гэта ж бяскрыўдная справа. Але з-за таго, што ён у абарону сьвятыні, дык улады ня хочуць і яго дазваляць».

Хоць і ў скарочаным фармаце, але акцыю па абароне касьцёлу ўсё ж удалося правесьці. У ёй узялі ўдзел каля 10 актывістаў. Абаронцы касьцёлу памаліліся за яго вяртаньне, прасьпявалі гімн «Магутны божа» і зачыталі шэраг заяваў.

Актывісты вырашылі зьвярнуцца ў пракуратуру па абарону ад людзей ў цывільным, якія не называюцца, ня маюць формы, але перашкаджаюць праводзіць мерапрыемствы і робяць свавольныя затрыманьні.

Жанчына: «Зараз міліцыянты мусяць насіць такія бэджыкі з прозьвішчамі. Чаму сюды прыходзяць ў цывільным, бяз бэджыкаў, і робяць што заўгода?»

Ва ўсім сьвеце затрымліваць маюць права толькі паліцыянты у форме, а ў нас гэта нейкая банда дзейнічае.
Маладая жанчына: «Мы будзем пісаць ў пракуратуру. Ва ўсім сьвеце затрымліваць маюць права толькі паліцыянты у форме, а ў нас гэта нейкая банда дзейнічае. Гэта бандыцкая дзяржава атрымліваецца».

На плошчы Свабоды побач з касьцёлам сьвятога Язэпа, дзе зараз знаходзіцца частка нацыянальнага архіву, будуецца дзіцячая філярмонія. Яе будынак паўторыць праект будынку грэка-каталіцкай царквы, у часы Расейскай імпэрыі аддадзенай праваслаўным вернікам, а потым пры бальшавіках увогуле зруйнаванай.

«Мы за тое, каб гэты храм таксама вярнулі хрысьціянам, а яны паміж сабой разьбяруцца», — агучыла ініцыятыву Ірына Губская.

Актывісты таксама запрасілі на будучыя акцыі кандыдатаў у прэзыдэнты, каб тыя азнаёмілі прысутных з сваімі выбарчымі праграмамі.

22 верасьня, паводле аб’явы, на пляцоўцы каля касьцёлу мае адбыцца бардаўскі канцэрт. Пачатак акцыі зноў а 19-й гадзіне.



Ад 16 верасьня штодня каля менскага касьцёлу сьвятога Язэпа праходзяць акцыі за вяртаньне гэтай сьвятыні вернікам і ўратаваньне кляштара бэрнардынцаў. Улады плянуюць перабудаваць кляштар пад гатэль і забаўляльныя установы, а касьцёл не зьбіраюцца вяртаць вернікам, матывуючы гэта недахопам памяшканьняў пад архівы.

Затрымліваюць Віталя Рымашэўскага

Затрыманьне Паўла Севярынца


Сёньня ганак касьцёлу быў заняты аўтамабілем.
Нягледзячы на затрыманьні, акцыя адбылася.

Паказаць камэнтары

XS
SM
MD
LG