Партыя БНФ і прэзыдэнцкія выбары

Як паведаміў “Свабодзе” старшыня Партыі БНФ Лявон Баршчэўскі, зарэгістравалася больш за 220 дэлегатаў.



На абмеркаваньне вынесена тры пытаньні – аб сацыяльна-эканамічнай сытуацыі ў Беларусі, аб геапалітычным выбары і аб магчымым удзеле партыі ў прэзыдэнцкай кампаніі.



Па першым пытаньні выступіў намесьнік старшыні Партыі БНФ Віктар Івашкевіч. Віншаваньні сходу даслалі паэт Рыгор Барадулін, старшыня Вярхоўнага Савету 12-га скліканьня Станіслаў Шушкевіч, выступілі таксама экс-кандыдат на прэзыдэнта Аляксандар Казулін, адзін з лідэраў беларускай сацыял-дэмакратыі Мікола Статкевіч, Леў Марголін ад АГП.



Удзельнікі сходу, выступаючы з трыбуны, казалі, што сапраўды стан беларускай эканомікі цяпер значна адрозьніваецца ад таго, што было яшчэ год таму, людзі сталі жыць значна горш і трэба скарыстаць гэтую сытуацыю -- менш займацца агульнымі праблемамі, а ісьці да людзей і размаўляць зь імі не пра высокія матэрыі, а пра канкрэтную сытуацыю.


Прагучала і крытыка на адрас кіраўніцтва партыі. Спадар Панамароў з Клецку зазначыў, што за 4 апошнія гады ніхто зь кіраўнікоў Партыі БНФ не прыехаў ані ў Клецк, ані ў Нясьвіж.

Даклад пра геапалітычную сытуацыю зрабіў намесьнік старшыні партыі Вінцук Вячорка. Выступоўцы казалі, што добра, што Беларусь пачала дыялёг з Эўразьвязам, але Партыя БНФ лічыць і патрабуе ад свайго кіраўніцтва, каб яно пры размовах з прадстаўнікамі розных міжнародных структураў абавязкова нагадвалі, што ад Аляксандра Лукашэнкі трэба патрабаваць сапраўдных зьменаў, а не імітацыі.


Удзельнікі сходу прысьвяцілі гэтую падзею першаму зь’зду БНФ, які адбыўся 20 гадоў таму ў Вільні..