Лінкі ўнівэрсальнага доступу

У інтэрвію амэрыканскай газэце “The Wallstreet Journal” кіраўнік Беларусі Аляксандар Лукашэнка выказаў зацікаўленасьць у наладжваньні дыялёгу з ЗША. Аднак прадстаўнікі дэмсілаў у Беларусі спадзяюцца, што ЗША будуць пасьлядоўнымі ў абароне традыцыйна амэрыканскіх каштоўнасьцяў.

Аляксандар Лукашэнка спадзяецца пры новым прэзыдэнце ЗША Бараку Абаме наладзіць беларуска-амэрыканскія дачыненьні і вярнуцца да “таго этапу, якасьці, якія былі да крызісу”. Аднак, усё, маўляў, залежыць ад Вашынгтону. Кіраўнік Беларусі хоча пачатку дыялёгу без “выбудоўваньня нейкіх дадатковых бар’ераў і папярэдніх умоваў”.

Намесьнік старшыні Партыі БНФ Вінцук Вячорка з гэтай нагоды заявіў:

Вінцук Вячорка
“Тут, сапраўды, шмат што залежыць ад новай амэрыканскай адміністрацыі. Наколькі яна будзе пасьлядоўнай у абароне традыцыйна амэрыканскіх каштоўнасьцяў, сярод якіх свабода, дэмакратыя і правы чалавека. Яны заўсёды мелі ключавую ролю. Я думаю, што Лукашэнку спадабалася нічым не заслужаная індульгенцыя з боку Эўрапейскага зьвязу. Яму спадабалася тое, што, фактычна, ніякіх каштоўнасных патрабаваньняў цяпер абсалютная бальшыня эўрапейцаў не агучвае, наіўна спадзеючыся паўдзельнічаць у анансаванай Лукашэнкам прыватызацыі. Дарэчы, лопнула, як мыльная бурбалка, эўрапейскае апраўданьне новай палітыкі стасоўна Лукашэнкі клопатам пра незалежнасьць Беларусі. Лопнула яно разам з аднаўленьнем дыялёгу з Расеяй пасьля расейска-грузінскай вайны. Ну вось жа цяпер Лукашэнка спадзяецца на такую ж беспрынцыповасьць з боку ЗША”.

Афіцыйны Менск пакуль не прызнаў незалежнасьць Абхазіі і Паўднёвай Асэтыі. Аднак у інтэрвію Аляксандар Лукашэнка заявіў, што беларускі бок падтрымае Расею ў яе “адэкватных дзеяньнях” у адказ на разьмяшчэньне амэрыканскіх проціракет у Эўропе.

Ці выкліканыя заявы кіраўніка Беларусі аб паляпшэньні стасункаў з ЗША падрыхтоўкай да сустрэчы з прэзыдэнтам Расеі і спрэчкамі па цэнах на расейскі газ? Палітоляг Андрэй Фёдараў не выключае такога сцэнару:

Андрэй Фёдараў
“Калі ў нас узьнікае напружанасьць у размовах з Масквой, то заўсёды пачынаюцца нейкія меры па паляпшэньні стасункаў з Захадам. Тут гэтага выключаць нельга. Па-другое, абраны новы прэзыдэнт ЗША, які абяцаў крыху зьмяніць зьнешнюю палітыку. Пакуль пра Беларусь ён нічога не казаў. Але агульныя падыходы яго, як быццам, новыя. Па трэцяе, яшчэ і газэта “The Wallstreet Journal” амэрыканская. Так што тут такая сукупнасьць фактараў, я думаю, тут усё адзін да аднаго”.

Нагадаем, што дачыненьні з ЗША былі сапсаваныя яшчэ ў сярэдзіне 90-х гадоў. А ўвядзеньне санкцый супраць канцэрну “Белнафтахім” на пачатку гэтага году прывяло да дыпляматычнага канфлікту. Амбасадарка ЗША Карэн Ст’юарт вымушана была пакінуць Беларусь, а склад амбасады значна паменшыўся. Амэрыканскі бок увёў санкцыі, патрабуючы вызваленьня палітвязьняў. Пасьля таго як апошні палітвязень зь міжнародна прызнанага сьпісу выйшаў на волю, ЗША адмянілі санкцыі супраць двух беларускіх прадпрыемстваў.

Паказаць камэнтары

XS
SM
MD
LG