Лінкі ўнівэрсальнага доступу

Адна зь перадачаў Беларускай тэлевізіі навяла аднаго нашага слухача на думку, што прэзыдэнцкія выбары ў Беларусі адбудуцца не ў 2011, а ў 2010 годзе.

Слухач “Свабоды” затэлефанаваў на наш тэлефон-аўтаадказьнік 266-39-52 і зьвярнуўся па ўдакладненьне:

“Па тэлевізіі былы і цяперашні дэпутат Давыдзька - ці то ён прагаварыўся, але ніхто і не паправіў - сказаў, што ў нас 2010 год важны - будуць выбары прэзыдэнта. Можа, і сапраўды перайгралі і будзем прэзыдэнта выбіраць у 2010 годзе? Удакладніце, калі ласка”.

Удакладніць сытуацыю мы папрасілі сакратара Цэнтральнай выбарчай камісіі Мікалая Лазавіка:

“Выбары прэзыдэнта ў нас праводзяцца за два месяцы да завяршэньня тэрміну паўнамоцтваў. Тэрмін паўнамоцтваў распачынаецца з моманту інаўгурацыі. Інаўгурацыя была 8 красавіка. Значыць, выбары прэзыдэнта павінны быць не пазьней за 8 лютага [2011 году. - вэб-радактар]. Прыкладна ў гэты ж час завяршаецца тэрмін паўнамоцтваў дэпутатаў мясцовых саветаў. А менавіта: выбары адбываліся 14 студзеня — значыць, да 14 сьнежня [2010 году. - вэб-радактар] павінны прайсьці выбары дэпутатаў мясцовых саветаў. Канечне, дзьве выбарчыя кампаніі за такі кароткі прамежак часу — гэта вельмі вялікая нагрузка ня толькі для арганізатараў выбараў, але і для саміх выбарцаў, гэта вялікія фінансавыя выдаткі. Таму мы, сябры Цэнтравыбаркаму, лічым, што было б мэтазгодным аб’яднаць гэтыя дзьве кампаніі. Але паколькі выбары дэпутатаў нельга праводзіць пазьней за сярэдзіну сьнежня, то неабходна будзе раней правесьці прэзыдэнцкія выбары. Вось пакуль што такія чыста тэарэтычныя развагі”.

Паказаць камэнтары

XS
SM
MD
LG