Як гаворыцца ў такіх выпадках, відаць у лесе нешта вялікае здохла. З “круглага стала” ў «Советской Белоруссии» і зь перадачы першага каналу БТ зьдзіўлены чытач і глядач раптам даведаўся, што Беларуская Народная Рэспубліка – зусім не “нацыяналістычна-буржуазнае марыянэткавае ўтварэньне”, а калі ня слаўная, то па меншай меры годная старонка беларускай гісторыі, якой у пэўнай ступені абавязаная сваім існаваньнем сёньняшняя Рэспубліка Беларусь. Тых, хто гэтак меркаваў і раней, а тым больш тых, для каго ідэалы БНР – гэта сьвятое, больш займае пытаньне, навошта ўладам гэта спатрэбілася і што ж з гэтага будзе?
