Намесьніка дырэктара менскага бару «Барсук» Мікалая Пекара арыштавалі на 15 сутак, паведамляе праваабарончы цэнтар «Вясна».
Супрацоўнікі крымінальнай міліцыі затрымалі Пекара 19 лютага на працоўным месцы ў менскім бары «Барсук». На яго склалі пратакол паводле артыкула 23.34 Адміністрацыйнага кодэксу за тое, што «пікетаваў з дапамогай БЧБ-карціны «Барсук», налепкі «Псіхо3%» і чахла на тэлефоне з Пагоняй».
ГЛЯДЗІЦЕ ТАКСАМА: «Маім прэзыдэнтам быў Лукашэнка». Што гавораць людзі, якія зьмянілі сваю пазыцыю пасьля лета-2020Працэс над Мікалаем Пекарам адбыўся 22 лютага ў судзе Кастрычніцкага раёну Менску. Сваёй віны мужчына на судзе не прызнаў і сказаў, што асабіста ён карціны не вывешваў. На судзе стала вядома, што ў пратаколе сьведкам быў беспрацоўны «Дзятлаў», але адвакат заўважыў, што ён жа і супрацоўнік крымінальнай міліцыі, які затрымліваў бармэна, і асоба, якая вяла адміністрацыйны працэс і складала рапарт.
Нягледзячы на тое, што ў Мікалая Пекара на ўтрыманьні двухмесячнае дзіця, судзьдзя Вольга Няборская асудзіла яго на 15 сутак.
ГЛЯДЗІЦЕ ТАКСАМА: «Хай аддасьць сьцяг!» Жыхарку Гомля асудзілі на трэція запар 15 дзён арышту