Генэральная пракуратура Беларусі паведаміла 21 верасьня пра завядзеньне крымінальных спраў супраць шэрагу кіраўнікоў беларускіх прадпрыемстваў за ўчыненьне буйной шкоды сваім прадпрыемствам празь перавышэньне паўнамоцтваў:
— Былога намесьніка генэральнага дырэктара «Гомельшкла» па камэрцыйных пытаньнях і лягістыцы падазраюць у шкодзе прадпрыемству на 205,5 тысячы расейскіх рублёў (на момант публікацыі — каля 6900 беларускіх) празь перавышэньне паўнамоцтваў.
— Былога дырэктара ААТ «Малочныя горкі» падазраюць у шкодзе на 266 тысяч беларускіх рублёў празь перавышэньне паўнамоцтваў.
— Дырэктара даччынага прадпрыемства па будаўніцтве водных сыстэмаў «Мазырская перасоўная мэханізаваная калёна 27» падазраюць у завышэньні аб’ёмаў выкананых працаў і шкодзе прадпрыемству ў 38,8 тысячы беларускіх рублёў.
— Начальніка Старадароскага лесапункту ААТ «Фандок» падазраюць у крадзяжы амаль 10 тысяч літраў паліва коштам у 11,5 тысячы рублёў і сьпісаньні яго як скарыстанага.
Першым двум паводле ч.3 арт. 426 КК РБ пагражае ад 3 да 10 год турмы з магчымай канфіскацыяй маёмасьці, трэцяму — столькі жа з магчымай канфіскацыяй маёмасьці паводле ч.3 арт 424 КК РБ, чацьвёртаму — столькі ж з абавязковай канфіскацыяй маёмасьці паводле ч.3 арт. 210 КК РБ.
Матэрыялы перададзеныя ў Сьледчы камітэт для папярэдняга расьсьледаваньня.
