Лінкі ўнівэрсальнага доступу

Ва Ўкраіне затрымалі кіроўцу цягача, на якім перавозіўся комплекс «Бук» перад катастрофай рэйсу МН17


«Бук», зь якога меркавана зьбілі самалёт, на трале, прычэпленым да грузавіка
«Бук», зь якога меркавана зьбілі самалёт, на трале, прычэпленым да грузавіка

Намесьнік кіраўніка Галоўнага сьледчага ўпраўленьня Службы бясьпекі Ўкраіны Віталій Маякоў заявіў, што ўкраінская спэцслужба затрымала кіроўцу цягача, на якім перавозіўся зэнітна-ракетны комплекс «Бук» перад катастрофай рэйсу МН17 у небе над Данецкай вобласьцю.

«Мы высьветлілі асобу зь ліку баевікоў, якая забрала гэты трэйлер на аўтапрадпрыемстве ў Данецку. Праз 3 гады нам удалося затрымаць гэтага грамадзяніна, які не падазраваў, што мы пра яго ведаем, калі ён перасякаў мяжу з Расеяй на падкантрольнай нам тэрыторыі», — паведаміў Віталій Маякоў сёньня на брыфінгу ў Кіеве.

Прадстаўнік СБУ прадэманстраваў журналістам відэазапіс, зроблены на мабільны тэлефон. Дзякуючы гэтаму запісу ўдалося вызначыць, каму належыць аўтацягач і хто ім кіраваў.

«Для падтрыманьня наступу баевікоў паблізу Савур-Магілы ў ноч з 16 на 17 чэрвеня 2014 году „Бук“ незаконна перамясьцілі церазь дзяржаўную мяжу Ўкраіны з Расейскай Фэдэрацыяй па маршруце: горад Данецк Растоўская вобласьць — пасёлак Северны Луганскай вобласьці — горад Сарокіна (раней Краснадон) Луганскай вобласьці. Яго бартавы нумар быў цалкам зафарбаваны», — адзначыў Віталь Маякоў.

Паводле СБУ, кіроўца быў затрыманы два гады таму і цяпер адбывае пакараньне на тэрыторыі Ўкраіны.

На пачатку ліпеня стала вядома пра затрыманьне Службай бясьпекі Ўкраіны аднаго з «камандзіраў узводу супрацьпаветранай абароны ДНР» Уладзіміра Цемаха, які займаўся пастаўкамі зброі з Расеі — яго вывезьлі зь непадкантрольнай Украіне тэрыторыі ў выніку спэцапэрацыі. На відэазапісе, распаўсюджаным у інтэрнэце, затрыманы прызнаваўся ў тым, што ён хаваў ракетны комплекс «Бук».

Сакратар Рады нацыянальнай бясьпекі і абароны Аляксандар Данілюк заявіў, што Ўладзімір Цемах быў сьведкам апэрацыі, у часе якой баявікі зьбілі пасажырскі Boeing MH17, і можа пацьвердзіць, што ракета была выпушчаная з комплексу «Бук». Апроч таго, ён асабіста ведаў усіх палявых камандзіраў незаконных узброеных фармаваньняў, а таксама дэталі апэрацыі і перамяшчэньня зброі.

«Боінг-777» авіякампаніі Malaysia Airlines, які выконваў рэйс MH17 з Амстэрдаму ў Куала-Лумпур, быў зьбіты 17 ліпеня 2014 году ў небе над Данбасам. Яго абломкі ўпалі недалёка ад вёскі Грабава на тэрыторыі, якую кантралявалі прарасейскія сэпаратысты. Загінулі ўсе 298 чалавек на борце, больш як дзьвесьце былі грамадзянамі Нідэрляндаў.

У траўні 2018 году Міжнародная сьледчая група JIT пацьвердзіла дачыненьне 53-й зэнітна-ракетнай брыгады, дысьлякаванай у Курску, да катастрофы з «Боінгам».

Пазьней Нідэрлянды і Аўстралія афіцыйна абвінавацілі Расею ў датычнасьці да крушэньня малайзійскага «Боінга». Заяву пра гэта зрабіла МЗС Нідэрляндаў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG