Лінкі ўнівэрсальнага доступу

Мытнік у судзе над французам з патронам: «Аглядалі, бо ў яго барада»


Жалян Віё ў судзе
Жалян Віё ў судзе

Сьведка Андрэй Крыцкі, супрацоўнік мытнай службы, у судовым працэсе над грамадзянінам Францыі Жалянам Віё распавёў, што агляд адбываўся з ініцыятывы памежніка.

Паводле яго, ёсьць спэцыяльныя «фактары рызыкі», пры наяўнасьці якіх адбываецца асабісты дагляд. На пытаньне судзьдзі, які фактар рызыкі быў у выпадку Віё, мытнік Крыцкі адказвае: «Напэўна, барада».

Ён патлумачыў, што француз прайшоў па «чырвоным калідоры», аднак не прад’явіў дэклярацыі і тавару.

«Наўмысна насіў патрон»,— у Гомлі судзяць француза Жаляна Віё

Мытнік сказаў, што зьвярнуўся да абвінавачанага па-ангельску з тыповымі пытаньнямі «Адкуль вы, куды накіроўваецеся, ці маеце пры сабе забароненыя рэчы?»

У адказ на апошняе пытаньне, як сьведчыць супрацоўнік мытні, Жалян Віё толькі ўсьміхнуўся. Пасьля чаго мытнік жэстамі папрасіў яго паказаць свае рэчы. На пытаньне судзьдзі, чаму камунікавалі з дапамогай жэстаў, мытнік адказвае, што «такіх словаў яшчэ ня ведае».

«Ён дастаў маленькі патрончык, які маглі б не знайсьці. Лічу, што ў яго не было намеру хаваць. У мяне вялікі досьвед працы, калі чалавек нешта хоча схаваць, ён дастае гэта ў апошні момант».

Судзьдзя Тамара Застаўнецкая (у цэнтры)
Судзьдзя Тамара Застаўнецкая (у цэнтры)

Мытнік апісвае, што ў заплечніку Віё яшчэ заставалася шмат рэчаў. Патрон ён дастаў з заплечніка разам зь іншымі дробнымі рэчамі і сказаў, што гэта «сувэнір».

«Я думаю, што чалавек проста забыў пра гэты прадмет. А калі я правёў апытаньне, ён успомніў пра яго і прад’явіў у ліку іншых рэчаў».

Пры гэтым мытнік прызнае, што парушэньне мытнага заканадаўства было, бо не было дэклярацыі і не прад’явілі тавар.

«Але па-чалавечы парушэньня не было». Сам Жалян Віё раней сьведчыў, што ня ведаў, празь які «канал» ён праходзіць мяжу, а запаўняць дэклярацыю яму ніхто не казаў.

Свой узровень веданьня ангельскай мовы супрацоўнік мытні ахарактарызаваў як «ганебны».

Жалян Віё
Жалян Віё

Сам Жалян Віён, які апошнія шэсьць гадоў жыве ў Лёндане, на просьбу ахарактарызаваць веданьне ангельскай мовы супрацоўнікамі беларускай мовы адказаў: «Абмежаваны».

24-гадовага францускага падарожніка Жаляна Віё затрымалі 21 верасьня на памежным пункце пропуску Новая Гута, пасьля чаго ён быў зьмешчаны ў Гомельскі сьледчы ізалятар № 3. Мытнікі сьцьвярджаюць, што Віё пешшу перасякаў беларуска-ўкраінскую мяжу і не задэкляраваў патрон. Сам ён у лісьце на волю пісаў, што стаў у «чырвоны калідор», каб задэкляраваць рэчы і патрон, падораны яму польскім сябрам. На судзе прысутнічаюць францускі консул Карын Бардзье, родны брат Жаляна, а таксама прадстаўнікі францускіх СМІ.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG