Незалежнае расьсьледаваньне пацьвердзіла вялізныя маштабы абстрэлаў Украіны расейскай артылерыяй летам 2014 году. Абʼяднаньне незалежных сьледчых Bellingcat апублікавала 21 сьнежня справаздачу з доказамі сотняў абстрэлаў.
Bellingcat раскрывае маштабы дзеяньняў расейскіх войскаў, выкарыстоўваючы зьвесткі з агульнадаступных спадарожнікавых здымкаў за пэрыяд лета — пачатку восені 2014 году.
Bellingcat паведамляе пра доказы сама меней 149 асобных выпадкаў трансгранічных абстрэлаў Украіны расейскімі войскамі. Па колькасьці выбуховых кратэраў на ўкраінскай тэрыторыі аўтары справаздачы падлічылі, што з расейскага боку па Украіне летам 2014-га былі выпушчаныя тысячы артылерыйскіх снарадаў.
«Гэта было сыстэматычнае імкненьне расейскіх вайскоўцаў зьнішчыць украінскія сілы, разьмешчаныя тады ўздоўж мяжы з Расеяй, – кажа аўтар справаздачы Шон Кейс. — І менавіта гэта — новае. Раней мы лічылі, што гаворка ішла пра спарадычныя напады, але, грунтуючыся на высновах гэтай справаздачы, мы цяпер ведаем, што гэта была буйнамаштабная спроба — фактычна акт вайны Расейскай Фэдэрацыі супраць Украіны, каб зьнішчыць украінскія вайсковыя падразьдзяленьні».
Сьляды абстрэлаў украінскай тэрыторыі з боку Расеі выяўленыя ўздоўж усёй паласы баявых дзеяньняў у Данецкай і Луганскай абласьцях. Bellingcat заяўляе, што памылкі ў высновах магчымыя толькі ў выпадку, калі хтосьці наўмысна сфальсыфікаваў спадарожнікавыя здымкі, але іх можна спраўдзіць і пацьвердзіць.