Лінкі ўнівэрсальнага доступу

Прысуд Хадаркоўскаму – 9 гадоў – камэнтуюць палітыкі і бізнэсмэны


Юры Дракахруст, Прага Сёньня быў агучаны прысуд былым кіраўнікам кампаніі "Юкос" Міхаілу Хадаркоўскаму і Платону Лебедзеву – па 9 гадоў пазбаўленьня волі. На думку аднаго з адвакатаў Хадаркоўскага Робэрта Амстэрдама гэта прысуд расійскаму прадпрымальніцтву як такому.

(Амстэрдам: ) "Хадаркоўскі і Лебедзеў былі прызнаныя вінаватымі ў прадпрымальніцтве, у інавацыях, у празрыстасьці бізнэсу. Менавіта празрыстасьць – тое, што выклікала асаблівыя перасьцярогі ўладаў, гэта тое, чаго яны ня могуць вытрымаць. Гэта прысуд бязьлітасны, брутальны і зусім неаб’ектыўны. Прысудзіўшы Хадаркоўскаму 9 гадоў, суд пазбавіў Расею будучыні яшчэ на 9 гадоў".

Натальля Вішнякова – прэсавы сакратар генэральнай пракуратуры Расеі лічыць прысуд справядлівым і пазбаўленым якой бы то ні было палітычнай матываванасьці.

(Вішнякова: ) "Мы лічым гэты прысуд справядлівым і адпаведным абставінам і цяжкасьці злачынстваў, учыненых Хадаркоўскім, Лебедзевым і Крайновым. Мы катэгарычна адмаўляем якую б то ні было палітычную подбіўку ў гэтай справе. Зроблены канкрэтныя цяжкія злачынствы, якія даказаныя".

Расейскі палітоляг Марк Урноў мяркуе, што прысуд Хадаркоўскаму – гэта сыгнал усяму расейскаму грамадзтву.

(Урноў: ) "Тое, што адбылося, сьведчыць, што ў Расеі зарэгістраваная адсутнасьць нармальнага суду, незалежнага і аб’ектыўнага. Такі жорсткі прысуд – амаль па максымуму, сьведчыць пра тое, што нам проста сказалі: “Дэмакратыі ў вас цяпер няма. Зразумелі?"

Сярод тых, хто стоячы на вуліцы каля Мяшчанскага суду Масквы, чакаў прысуду, быў амэрыканскі кангрэсмэн Том Ланташ. Пасьля абвяшчэньня вэрдыкту ён сказаў:

(Ланташ: ) "Мы імкнёмся падтрымліваць з Расеяй добрыя адносіны, але трэба адзначыць, што тэндэнцыя да цэнтралізацыі можа перашкодзіць нам лічыць гэтую краіну дэмакратычнай".
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG