Лінкі ўнівэрсальнага доступу

Магілёўшчына: чым займаюцца штабы кандыдатаў?


Радыё Свабода Пра тое, як праходзяць апошнія дні выбарчай кампаніі на Магілёўшчыне, гавораць прадстаўнікі штабоў кандыдатаў.

Актывісты штабоў і Мілінкевіча, і Казуліна скардзяцца, што мясцовая вэртыкаль адмаўляецца даваць вялікія залі для сустрэч з выбарцамі. У Бабруйску, да прыкладу, дазваляюць сустрэчы ў аддаленым маленькім кінатэатры “Перамога” ў прыватным сэктары, куды вельмі складана дабрацца.

Таіса Кабанчук, сябра штабу Аляксандра Казуліна, вельмі задаволеная паездкамі ў глыбінку:

(Кабанчук: ) “Па вёсках паезьдзілі ў Кіраўскім і Клічаўскім раёнах. І людзі так былі ўзрадаваныя, што да іх хтосьці прыехаў! Прапанавалі нам нават свае паслугі: “Дайце агітацыйныя матэрыялы, мы занясем на фэрмы. Мы адчуваем, што нам гавораць ня ўсю праўду”. Мы правялі міні-мітынгі ў вёсках. У Кіраўску таксама правялі міні-мітынг на рынку”.

На Магілёўшчыне кіраўнік абласнога штабу і давераныя асобы Аляксандра Мілінкевіча ізаляваныя – сядзяць у пастарунках Уладзімер Шанцаў, Рыгор Кастусёў, Сяргей Нягацін, Ігар Сімбіраў... Некаторыя хаваюцца.

Расказвае актывіст штабу Мілінкевіча ў Магілёве Сяргей Стральцоў:

(Стральцоў: ) “Аляксандар Сілкоў, выканаўца абавязкаў кіраўніка штабу Мілінкевіча, і я цяпер спрабуем асабліва не сьвяціцца ў тых месцах, дзе ў нас ёсьць падазрэньне, што вядзецца вонкавае назіраньне. Да суботы ня будзем начаваць дома, зьмянілі нумары тэлефонаў”.

Таіса Кабанчук таксама скардзіцца на звышпільную ўвагу праваахоўнікаў да актывістаў штабу.

(Кабанчук: ) “Мы напісалі некалькі скаргаў начальніку УУС на пастаянны перасьлед чальцоў маёй каманды. Маю машыну асабістую спыняюць праз кожныя 5 мэтраў. Нашых людзей затрымліваюць, трымаюць па гадзіне ў пастарунку. Стараемся працаваць ціха, у дварах, пад’ездах, калі распаўсюджваем прадукцыю, то як мага далей ад вачэй міліцыянтаў”.

А вось дзейнаму кіраўніку дзяржавы праводзіць агітацыйную работу зусім ня трэба, лічыць прэсавы сакратар штабу Аляксандра Лукашэнкі Дзьмітры Косьцін:

(Косьцін: ) “Наш кандыдат вельмі вядомы, таму такіх захадаў рабіць, як робяць іншыя кандыдаты, яму ня трэба. Такіх асабістых сустрэч, як праводзяць іншыя, не плянуецца”.
Ігар Лосік Кацярына Андрэева Ірына Слаўнікава Марына Золатава Ягор Марціновіч
XS
SM
MD
LG