Як адзначаецца ў афіцыйным паведамленьні арганізацыі, удар нанёс значную шкоду канструкцыі памяшканьня, у якім прымаюць паліва, уключна з офісам Інспэкцыі МАГАТЭ, што знаходзіцца ў тым жа памяшканьні.
«Група экспэртаў зафіксавала пашкоджаньні фасаду памяшканьня [...] і пацьвердзіла, што ўзроўні радыяцыі на аб’екце засталіся ў межах нормы, што сьведчыць аб адсутнасьці якога-небудзь радыяцыйнага забруджаньня ў выніку інцыдэнту», — паведамілі ў МАГАТЭ.
Як высьветлілася, на момант атакі адпрацаванае ядзернае паліва захоўвалася ў кантэйнэрах за некалькі сотняў мэтраў ад пашкоджанага памяшканьня, а іншыя кантэйнэры, якія знаходзіліся бліжэй, былі парожнімі. «Па-ранейшаму незразумела, калі аб’ект зноў зможа пачаць прымаць ядзернае паліва зь дзейных АЭС Украіны», — адзначылі экспэрты.
Генэральны дырэктар МАГАТЭ Рафаэль Гросі назваў гэты ўдар «надзвычай трывожным інцыдэнтам» з гледзішча ядзернай бясьпекі.
«Напад на аб’ект зь вялікай колькасьцю ядзерных матэрыялаў — гэта як гульня з агнём, і такога ніколі не павінна адбывацца», — сказаў Рафаэль Гросі. Ён дадаў, што МАГАТЭ працягне расьсьледаваньне інцыдэнту.
У ноч на 7 чэрвеня расейскія войскі пацэлілі ў сховішча дронам «Герань-2». Сьледчыя Службы бясьпекі Ўкраіны (СБУ) завялі крымінальную справу паводле гэтага інцыдэнту.
Чаму гэта важна
Цэнтралізаванае сховішча адпрацаванага ядзернага паліва (ЦСЯП) разьмешчана ў Чарнобыльскай зоне адчужэньня, недалёка ад былой вёскі Буракоўкі. Аб’ект знаходзіцца прыблізна за 15 кілямэтраў на захад ад Чарнобыльскай АЭС і прыкладна за 8 кілямэтраў ад мяжы зь Беларусьсю.
Сховішча прызначана для сухога захоўваньня адпрацаванага ядзернага паліва зь дзейных украінскіх атамных электрастанцыяў — Ровенскай, Хмяльніцкай і Паўднёваўкраінскай. Бясьпека і стан гэтага абʼекту выклікаюць павышаную ўвагу празь яго блізкасьць да зоны ваенных дзеяньняў і нядаўнія напады на інфраструктуру абʼекту.
Нядаўна Аляксандар Лукашэнка, камэнтуючы заяву вайскавода Сілаў бесьпілётных сыстэмаў Украіны Робэрта Броўдзі аб паўтысячы патэнцыйных цэляў у Беларусі ў выпадку яе далучэньня да вайны, паведаміў, што таксама мае цэлі ва Ўкраіне.
«У нас ёсьць адна цэль — вельмі сур’ёзная, з дакладнымі каардынатамі, і зусім недалёка ад Беларусі. Гэта ж яны таксама разумеюць», — заявіў Лукашэнка, але не ўдакладніў месца яе знаходжаньня.
Форум