Лінкі ўнівэрсальнага доступу

Памежны камітэт адказаў, ці заводзілі справы на мігрантаў за незаконнае перасячэньне мяжы і высяканьне дрэў


Мітынг мігрантаў у Брузгах. Лістапад 2021
Мітынг мігрантаў у Брузгах. Лістапад 2021

Дзяржаўны памежны камітэт Беларусі адказаў на пэтыцыю, у якой прасілі даць прававую ацэнку мігрантам, што на беларускім баку высякалі дрэвы і шкодзілі маёмасьць, а таксама ўладам, якія «бязьдзейнічалі і патуралі».

Тэкст звароту апублікавалі на партале «Зручны горад», ён сабраў блізу 1000 подпісаў. Аўтары пэтыцыі мяркуюць, што мігранты парушылі

  • арт. 24.23 КаАП (парушэньне парадку арганізацыі і правядзеньня масавых мерапрыемстваў),
  • арт. 310 КК (наўмыснае блякаваньне транспартных камунікацый), арт. 277 КК (незаконнае высяканьне дрэў),
  • арт. 218 КК (наўмыснае зьнішчэньне або пашкоджаньне чужой маёмасьці),
  • арт. 371 КК (незаконнае перасячэньне Дзяржаўнай мяжы Рэспублікі Беларусь) ды шэраг іншых.

Пры гэтым сілавікоў у пэтыцыі абвінавачвалі ў парушэньні

  • арт. 425 КК (бязьдзеяньне службовай асобы)
  • і арт. 371-1 КК (арганізацыя незаконнай міграцыі).


Зь Дзяржаўнага памежнага камітэту прыйшоў адказ за подпісам начальніка ўпраўленьня Андрэя Куксава. Спачатку чыноўнік патлумачыў, што мігранты «па ўсіх правілах спрабуюць трапіць у Эўразьвяз, а эўрапейскія сілавікі іх выганяюць назад у Беларусь». А затым прадстаўнік ведамства расказаў пра крымінальны перасьлед.

На яго думку, асноўную пагрозу бясьпецы Рэспублікі Беларусь ствараюць «зусім не ўцекачы»:

«Беручы пад увагу ўразьлівае становішча бежанцаў, нязначнасьць учыненых імі дзеяньняў, а таксама той факт, што большасьць падзеяў, зьвязаных са спробамі падачы хадайніцтваў аб наданьні прыстанішча адбываюцца на замежнай тэрыторыі, адміністрацыйны або крымінальны працэс у адносінах да названай катэгорыі асобаў не пачынаўся», — напісаў супрацоўнік Дзяржаўнага памежнага камітэту Андрэй Куксаў.

Раней службы лясной гаспадаркі на запыт аўтараў іншай пэтыцыі ўхіліліся ад адказнасьці, парэкамэндаваўшы зьвярнуцца ва «ўпаўнаважаныя органы» для складаньня пратаколаў аб адміністрацыйных правапарушэньнях «за незаконнае выдаленьне, пашкоджаньне дрэўна-хмызьняковай расьліннасьці, якая расьце за межамі населеных пунктаў і не ўваходзіць у склад земляў ляснога фонду».

Мігранцкі крызіс — 2021. Асноўнае

  • У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень — звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
  • Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
  • Урады Літвы, а затым Латвіі і Польшчы, улетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
  • У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
  • Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу.
  • Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
  • Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы. Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям.
  • 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў.
  • 8 кастрычніка Варшава заявіла, што трактуе паводзіны беларускага боку як «агрэсіўныя дзеяньні супраць Польшчы». Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
  • На межах Беларусі з Польшчай і Літвой ад пачатку міграцыйнага крызісу загінулі сама меней 9 чалавек.
  • 8 лістапада раніцай на мяжы зь беларускага боку заўважылі буйную калёну зь некалькіх сотняў мігрантаў, якія рушылі ў суправаджэньні ўзброеных сілавікоў да калючага дроту на мяжы з Польшчай, намагаючыся перасекчы мяжу. Паводле розных ацэнак, іх колькасьць была ад 2 да 4 тысяч чалавек. Многія атрымалі візы ў беларускім дыпляматычным прадстаўніцтве ў Анкары, турэцкія авіякампаніі ўдзельнічаюць у перакіданьні мігрантаў у Беларусь.
  • У наступныя дні мігранты пры спрыяньні беларускіх сілавікоў сталі лягерам на памежнай паласе. Курд з Іраку Рэбаз Наджм Хама Саід сказаў Свабодзе, што беларуская міліцыя дапамагае высякаць дрэвы для вогнішчаў на беларускай жа тэрыторыі. Некаторым групам удалося прарвацца на польскую тэрыторыю, але вайскоўцы затрымалі ўсіх парушальнікаў.
  • 10 лістапада эўрадэпутат Радаслаў Сікорскі заявіў, што крызіс на мяжы ініцыяваны пры падтрымцы Масквы, а Лукашэнку трэба прызнаць тэрарыстам і выдаць Міжнароднаму трыбуналу. Шэраг іншых эўрапейскіх палітыкаў таксама выказалі ўпэўненасьць, што Пуцін з дапамогай Лукашэнкі расхіствае Эўропу, пачуліся заклікі да ЭЗ дзейнічаць актыўна, а не чакаць.
  • 11 лістапада ў паветранай прасторы Беларусі пачалі патруляваць межы расейскія бамбавікі Ту-22М3. Яны належаць паветрана-касьмічным сілам Расеі.
  • 11 лістапада Фэдэральная паліцыя Нямеччыны заявіла, што толькі за першыя дні лістапада ў краіну трапілі больш за тысячу мігрантаў, якія выкарысталі Беларусь як краіну транзыту.
  • Са жніўня польскія памежнікі спынілі больш за 33 тысячы спробаў нелегальнага перасячэньня мяжы з боку Беларусі, летась іх было 88.
  • 15 лістапада больш за 3 тысячы мігрантаў сабраліся на беларускім памежным пераходзе «Брузгі» перад лініяй польскай мяжы, умацаванай часовымі загародамі і шарэнгай польскіх вайскоўцаў.
  • Па словах прэс-сакратара Лукашэнкі Натальлі Эйсмант, у Беларусі агулам каля 7 тысяч мігрантаў, якія спадзяюцца трапіць у Нямеччыну.
  • 22 лістапада ў Бэрліне адмовіліся прымаць каля 2 тысяч чалавк з Блізкага Ўсходу, якія прыбылі ў Беларусь пасьля арганізацыі рэжымам Лукашэнкі мігранцкага крызісу.
  • 25 лістапада мігранты правялі акцыю пратэсту на памежжы, заяўляючы, што ня хочуць вяртацца назад у свае краіны.
  • На больш чым дзесяці эвакуацыйных рэйсах у Ірак і Сырыю ў лістападзе-сьнежні Беларусь пакінулі каля 4,5 тысяч мігрантаў.
  • На пачатку 2022 году сталі вядомыя тэрміны пабудовы агароджаў на мяжы зь Беларусьсю. Польшча адзначыла, што агароджу дабудуюць да канца чэрвеня, а Літва, што да восені.
  • За 2023 год памежнікі суседніх зь Беларусьсю краін Эўразьвязу спынілі 42 тысячы спробаў нелегальнага пранікненьня на сваю тэрыторыю, што на траціну больш за 2022 год.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG