Авіябаза ў Ліелвардэ, разьмешчаная на паўднёвы ўсход ад Рыгі, была пабудаваная савецкімі вайскоўцамі яшчэ ў 1970 годзе. Яна была адной з найбуйнейшых у Балтыі.
«Цяпер саюзныя ВПС NATO маюць доступ да яшчэ аднаго мадэрнізаванага вайсковага аэрадрому ў рэгіёне Балтыі. Аэрадром Ліелвардэ здольны прымаць саюзныя самалёты ў любы час сутак і ў любых умовах надвор’я», — паведамляе NATO.
Паводле паведамленьня, «зьнішчальнікі NATO, якія праводзяць патруляваньне ў рэгіёне Балтыі, змогуць выкарыстоўваць аэрадром у якасьці запасной узьлётна-пасадачнай пляцоўкі».
Гэта значыць, у выпадку немагчымасьці выкарыстаньня авіябазаў ў Эмары ў Эстоніі і ў Шаўлях у Літве зьнішчальнікі будуць накіроўвацца ў Ліелвардэ ў Латвіі. У найбліжэйшым часе на латвійскі аэрадром ужо плянуюць прыбыць дацкія зьнішчальнікі F-16 для правядзеньня на ратацыйнай аснове натаўскага патруляваньня ў балтыйскім рэгіёне.
У NATO падкрэсьлілі, што авіябаза ў Ліелвардэ ў Латвіі будзе мець вялікае значэньне для перадавога разьмяшчэньня сіл альянсу на яго ўсходнім флянгу.
На авіябазе акрамя зьнішчальнікаў будуць таксама разьмяшчацца вайскова-транспартныя самалёты і бесьпілётныя лятальныя апараты.