У заяве найбуйнейшага ў сьвеце аб’яднаньня юрыстаў нагадваецца, што Знак быў арыштаваны ўладамі Беларусі ў мінулым годзе пасьля таго, як прадстаўляў апазыцыйных палітычных дзеячоў і ўдзельнічаў у стварэньні Каардынацыйнай рады. ABA заклікае ўлады Беларусі выконваць міжнародныя і мясцовыя прававыя стандарты для абароны правоў адвакатаў і забесьпячэньня таго, каб адвакаты не зазнавалі пакараньняў або перасьледу за выкананьне сваіх прафэсійных абавязкаў. Асноўныя прынцыпы ААН, якія тычацца ролі юрыстаў, таксама ўсталёўваюць, што адвакаты і юрысты, як і іншыя грамадзяне, маюць права на свабоду выказваньня меркаваньняў, перакананьняў, асацыяцый і сходаў.
АВА заклікае вызваліць Знака і аднавіць правы адвакатаў, якія зазналі ў Беларусі аналягічны перасьлед, былі адвольна пазбаўленыя адвакацкага статусу або прыцягнутыя да адказнасьці.
- Амэрыканская асацыяцыя юрыстаў (American Bar Association) — аб’яднаньне юрыстаў ЗША, якое прымае ў свае сябры таксама і юрыстаў іншых краін. Гэта адна з найбуйнейшых асацыяцый у сьвеце, цяпер яна абʼядноўвае больш за 400 тысяч чалавек з усяго сьвету, сярод якіх шмат і студэнтаў юрыдычных факультэтаў унівэрсытэтаў. Сярод асноўных мэтаў арганізацыі — распрацоўка этычных стандартаў для юрыстаў розных спэцыялізацый.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў