Лінкі ўнівэрсальнага доступу

Памёр «бацька эўра» і распрацоўнік «ідэальнай эканамічнай мадэлі для малых краін» Робэрт Мандэл


Робэрт Мандэл, архіўнае фота

Ляўрэат Нобэлеўскай прэміі у эканоміцы, адзін з «бацькоў эўра» Робэрт Мандэл памёр у 88 гадоў у Італіі, у Таскане, дзе жыў апошнія гады.

Пра гэта паведамляе Bloomberg, спасылаючыся на прадстаўніка Калюмбійскага ўнівэрсытэту, дзе Мандэл быў ганаровым прафэсарам.

Робэрта Мандэла лічаць ідэйным натхняльнікам стварэньня адзінай валюты для Эўропы. Ад пачатку 1960-х гадоў ён падтрымліваў ідэю агульнаэўрапейскага эканамічнага і валютнага саюзу і распрацаваў тэарэтычную аснову для ўвядзеньня эўра.

У 1999 годзе Мандэл атрымаў Нобэлеўскую прэмію ў эканоміцы за сваю тэорыю аб тым, што для посьпеху зоны з адзінай валютай неабходныя гнуткія рынкі, у тым ліку свабоднае перамяшчэньне працоўнай сілы і капіталу.

Прэмія стала вынікам шматгадовай працы навукоўца над стварэньнем ідэальнай мадэлі адкрытай эканомікі для малых краін.

Мандэл нарадзіўся ў 1932 годзе ў горадзе Кінгстан у канадзкай правінцыі Антарыё. Вучыўся ў Ванкувэры, Сіэтле і Лёнданскай школе эканомікі. З 1974 году і да самай сьмерці быў прафэсарам Калюмбійскага ўнівэрсытэту.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG