Лінкі ўнівэрсальнага доступу

Кампутарнага гуру Джона Макафі абвінавацілі ў махлярстве


Джон Макафі, 2012 (архіўнае фота)

Міністэрства юстыцыі ЗША заявіла, што Джон Макафі, які стаяў ля вытокаў стварэньня антывіруснага праграмнага забесьпячэньня, абвінавачваецца ў махлярстве і злачыннай змове з мэтай адмываньня грошай праз крыптавалюту.

Як паведамляе «Голас Амэрыкі» са спасылкай Міністэрства юстыцыі, у злачыннай схеме ўдзельнічалі Макафі і ягоны целаахоўнік Джымі Гейл Уотсан-малодшы. Макафі нібыта карыстаўся вялікай колькасьцю падпісчыкаў у твітэры, каб правакаваць зьмены курсаў крыптавалютаў, што дазваляла яму атрымліваць прыбытак.

Абвінавачваньні выставілі ў пятніцу ў фэдэральным судзе Мангэтэну. Пракурор Одры Штраўс заявіла, што Макафі і Уотсан «карысталіся папулярнай сацыяльнай сеткай і энтузіязмам інвэстараў на рынку крыптавалютаў, каб з дапамогай хлусьні зарабіць мільёны». Паводле ацэнкі Міністэрства юстыцыі ЗША, выкарыстаньне злачыннай схемы дазволіла Макафі і яго саўдзельніку атрымаць больш за 13 мільёнаў даляраў.

Макафі ўтрымліваецца пад вартай у Гішпаніі, Уотсан быў арыштаваны ў чацьвер увечары ў Тэхасе.

Імя McAfee носіць кампанія — вытворца антывірусных праграмаў. Джон Макафі ў 1994 годзе сышоў з пасады кіраўніка заснаванай ім фірмы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG