Лінкі ўнівэрсальнага доступу

Амаль 70 тысяч эўра для дапамогі Беларусі і Ўкраіне сабралі на тэлемаратоне літоўскай тэлевізіі


«Ланцуг салідарнасьці» ад Вільні да беларускай мяжы 23 жніўня 2020 году

Літоўская грамадзкая тэлевізія LRT правяла дабрачынны маратон «Разам да перамогі», на якім сабралі 68 607 эўра для падтрымкі пацярпелым падчас пратэстаў у Беларусі і на дапамогу ўкраінскаму Данбасу, перадае БелаПАН.

Зь беларускага боку дапамогу атрымаюць фонды BySol і «Страна для жизни».

«Мы гаворым пра роднасны і гістарычна блізкі нам народ. Літоўцы нямала ахвяравалі за свабоду, і ніхто ня можа ведаць і больш спачуваць тым, хто за яе змагаецца, чым мы», — сказаў прэзыдэнт Літвы Гінтас Наўседа, пад патранажам якога праходзіў тэлемаратон.

«Калі народ задушаны дыктатарам, мы павінны быць разам са сваімі братамі-беларусамі і гаварыць пра гэта», — сказаў ён.

У тэлемаратоне ўдзельнічала Сьвятлана Ціханоўская.

«Беларусы цяпер умацоўваюць структуры, які стварылі, людзі вучацца камунікаваць адзін з адным, самі прымаць рашэньні. Гэта начаткі дэмакратыі, якім таксама трэба вучыцца», — сказала Ціханоўская.

Яна чакае, што да вясны масавыя пратэсты ўзновяцца. «Падчас яе ўсё і атрымаецца».

«Спачатку беларусы вельмі зьдзівілі мяне, я захаплялася, — сказала экс-прэзыдэнт Літвы Даля Грыбаўскайце. Як яны змагаліся, як яны разумелі сваю будучыню, што яны самі павінны абараняць сваю свабоду і дэмакратыю».

Часам такая барацьба працягваецца вельмі доўга, сказала Грыбаўскайце:

«Нават нам трэба ўвесь час бараніць нашую свабоду. Мы разумеем гэтую сытуацыю, гэта нашыя суседзі, браты і сёстры. Гэта вялікая адказнасьць — працягнуць ім руку дапамогі».

Падчас тэлемаратону дэманстраваліся кадры 1991 году, калі літоўцы абаранялі незалежнасьць, пратэстаў у Беларусі, а таксама з усходняй Украіны. Лёзунг акцыі — «Наша свабода вырасла, давайце дапаможам вырасьціць яе нашым суседзям».

«Галоўнае, каб ён [пратэст] не спыніўся, ня згас. Усе стаміліся, хваля пратэстаў аслабла, магчыма, яны набывае іншыя формы, сышла ў падпольле», — сказаў пасол Літвы ў Беларусі Андрус Пулокас, якія пасьля адкліканьня знаходзіцца ў Вільні. На ягоную думку, галоўнае, што трэба цяпер беларусам — «увага простых людзей да простых людзей».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG