Суд над звольненай зь Менскага дзяржаўнага лінгвістычнага ўнівэрсытэту Натальляй Дулінай адбудзецца 2 лістапада, выхадныя яна правядзе ў зняволенні, паведамляе БелаПАН са спасылкай на калег выкладчыцы.
Дацэнтка Дуліна была затрыманая сёньня каля МДЛУ невядомымі. Пазьней зьявілася інфармацыя аб тым, што яна дастаўленая ў ізалятар часовага ўтрымання на Акрэсьціна і застанецца там да суду.
Як мяркуецца, Дуліна затрыманая паводле адміністрацыйнага артыкулу.
30 кастрычніка каля МДЛУ прайшла акцыя салідарнасьці з адлічанымі студэнтамі і звольненымі выкладчыкамі. У ёй прынялі ўдзел студэнты, іх бацькі, выкладчыкі і выпускнікі.
Натальлю Дуліну, калі яна выйшла з МДЛУ, людзі сустрэлі аплядысмэнтамі. Яны трымалі расьцяжку са словамі «VIVA Дуліна!» і скандавалі «Дуліна, мы ганарымся!», «Дзякуй!», «Жыве Беларусь!», «Саша, ты адлічаны!».
«Загад аб маім звальненні ёсьць, я яго яшчэ не падпісала, таму што знаходжуся ў забастоўцы», — паведаміла выкладчыца.
«Па сутнасці, мяне звольніў Лукашэнка сваімі словамі 27 кастрычніка. Астатнія толькі навыперадкі выконваюць яго загады», — сказала Дуліна.
27 кастрычніка на нарадзе ў справе падрыхтоўкі Ўсебеларускага народнага сходу Аляксандр Лукашэнка заявіў:
«Хто выйшаў, парушаючы закон, на несанкцыянаваныя акцыі, пазбаўляецца права быць студэнтам. Калі ласка, адпраўце іх, як я казаў, каго ў армію, а каго на вуліцу. Няхай ходзяць па вуліцы. Але яны павінны быць адлічаныя з ВНУ. Тое ж самае выкладчыкі, іх таксама адзінкі, якія брыдка сябе паводзяць у ВНУ».
Дацэнт катэдры італьянскай мовы Натальля Дуліна прапрацавала ў МДЛУ 29 гадоў. Разам зь дзвюма іншымі выкладчыцамі яна звольненая з ВНУ за актыўную грамадзянскую пазыцыю. Сёньня стала вядома, што ўнівэрсытэт на знак салідарнасьці з калегамі пакінула прафэсар катэдры агульнага мовазнаўства Алена Лукашанец.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў