Супрацоўнікі розных арганізацый і ўстановаў Беларусі працягваюць пісаць адкрытыя звароты з патрабаваньнямі да ўлады спыніць гвалт супраць мірных пратэстоўцаў і правесьці новыя прэзыдэнцкія выбары. Падобны дакумэнт падпісалі 170 супрацоўнікаў сталічнага праектнага інстытуту «Мінскінжпраект», піша Tut.by.
Прадстаўнікі працоўнага калектыву праектнага інстытуту ў сваім звароце выказваюць занепакоенасьць тым, што адбываецца ў Беларусі, выступаюць супраць гвалту і заяўляюць, што хочуць, каб іх падаткі ішлі на мірнае разьвіцьцё краіны.
«Мы, работнікі УП „Мінскінжпраект“, праектуем бясьпечныя вуліцы і збудаваньні для нашай краіны. Але цяпер вуліцы перасталі быць бясьпечнымі. Людзей выкрадаюць і зьбіваюць у любы час дня і ночы за тое, што яны патрабуюць праўды і хочуць быць пачутымі», — гаворыцца ў звароце.
У звароце яны патрабуюць:
- правядзеньня паўторных прэзыдэнцкіх выбараў з прыцягненьнем незалежных назіральнікаў,
- спыненьня гвалту, неабгрунтаваных затрыманьняў і перасьледу мірных грамадзян з боку сілавікоў,
- расьсьледаваньня выпадкаў зьбіцьця і катаваньняў з прыцягненьнем вінаватых да адказнасьці,
- вызваленьня палітвязьняў і ўдзельнікаў мірных дэманстрацый, якія апынуліся пад вартай,
- максымальнай ідэнтыфікацыі праваахоўнікаў, якія знаходзяцца пры выкананьні службовых абавязкаў, бо «праваахоўнік не павінен выглядаць і дзейнічаць, як бандыт».
Адкрыты зварот адрасаваны кіраўніку Менгарвыканкаму, кіраўніку адміністрацыі Ленінскага раёну Менску і генэральнаму пракурору Беларусі. Усяго свае подпісы пад дакумэнтам паставілі 170 супрацоўнікаў установы.
