У дзень візыту ў Беларусь прэм’ер-міністра Расеі Міхаіла Мішусьціна выкладчыца ангельскай мовы Валянціна Голубева выйшла да амбасады РФ з плякатам «Найлепшая дапамога РФ РБ — не падтрымліваць дыктатара». Яе затрымалі, і 3 гадзіны яна правяла ў РУУС Цэнтральнага раёну.
«Людзі рыхтуюцца адстойваць сувэрэнітэт любымі спосабамі»
«Гэта быў зручны момант заявіць пра настроі беларусаў, — тлумачыць Валянціна свой учынак.
Валянціна кажа, што выхад на адзіночны пікет — гэта «не спантанны ўсплёск эмоцый», ён тлумачыцца кантэкстам усяго, што адбываецца ў краіне.
«Лукашэнка рэанімаваў мэханізмы Савецкага Саюзу, — кажа яна. — Яны працавалі, пакуль не надышоў час зрабіць якасны рывок у інфармацыйнае грамадзтва».
Грамадзтва і бізнэс гэты рывок зрабілі, мяркуе Валянціна, а Лукашэнка і ягоная вэртыкаль засталіся ў мінулым.
«Згубленая сувязь паміж уладай і народам. Улада ня чуе народ, не разумее, чаго хочуць людзі, ня ўмее выбудаваць камунікацыі, — тлумачыць выкладчыца. — І самае жахлівае, што яны не разумеюць, як глыбока яны памыляюцца ў сваёй ацэнцы сытуацыі, што яны засталіся за бортам цеплахода пад назвай „Жыцьцё“. Адсюль і гульня мускуламі, стаўкі на гвалт, падман і маніпуляцыі. Фактычна ўсе крокі Лукашэнкі і ягонага апарату сымптаматычныя і паказваюць, што цыкль жыцьця апошняга дыктатара Эўропы ўвайшоў у завяршальную стадыю».
Яна лічыць, што ў гэтай агульнай «клініцы» дачыненьні з Расеяй займаюць асаблівае месца.
«Пагроза нашаму сувэрэнітэту навісла ў жніўні 2019 году, — нагадвае яна пра „таемныя“ перамовы паміж урадамі Аляксандра Лукашэнкі і Ўладзіміра Пуціна. — Калі рэжым Лукашэнкі захістаўся, непакой і апасеньні народу ўзмацніліся».
Валянціна кажа, што гэтыя апасеньні падаграюцца праўрадавай прапагандай пра тое, што «Беларусь хочуць разарваць», «краіну ўжо падзялілі», што «змаганьне ў Беларусі носіць антырасейскі характар».
На думку Голубевай, мэта гэтай прапаганды відавочная — «падрыхтаваць пэўную частку расейскага грамадзтва да ўспрыняцьця магчымага ўварваньня ў Беларусь як дапамогі саюзнай дзяржаве».
«Людзі ў Беларусі насьцярожана назіраюць за любымі дзеяньнямі Лукашэнкі і Пуціна і іх функцыянэраў. Трэба ведаць нашых людзей, — кажа Валянціна. — Тут маўчаньне — зусім ня знак згоды. Людзі проста замерлі ў чаканьні пэўнай інфармацыі пра пляны Лукашэнкі і маральна рыхтуюцца адстойваць наш сувэрэнітэт любымі спосабамі».
Але, кажа Валянціна, абмяркоўваць пэсымістычны сцэнар ня хочацца, а хочацца яго пазьбегнуць.
«Таму, ведаючы фэнамэнальныя здольнасьці Лукашэнкі пераварочваць факты ў жаданую яму плашчыню, я палічыла неабходным у дзень прыезду кіраўніка ўраду Расеі Міхаіла Мішусьціна зрабіць нешта, што магло б прыцягнуць грамадзкую ўвагу да пазыцыі беларускага грамадзтва ў дачыненьні да магчымых дзеяньняў Расейскай Фэдэрацыі», — тлумачыць Валянціна Голубева.
«Гэта ж да чаго трэба давесьці краіну?!»
Праз пару хвілін пасьля таго, як Валянціна разгарнула плякат, да яе падышоў ахоўнік амбасады, паглядзеў дакумэнты і папрасіў адысьці за 50 мэтраў ад плота амбасады.
А ў 14.50 Валянціну ўжо затрымалі людзі „ў бандыцкім адзеньні — байкі з капюшонамі, цёмныя акуляры“.
„Схапілі досыць груба, але я сказала, што няма патрэбы прымяняць сілу, і яны мяне проста трымалі“, — кажа Валянціна. — У машыне я запатрабавала адваката, на што апэратыўнік, які сядзеў за стырном, адказаў матам. Я зрабіла яму заўвагу — ён паўтарыў нецэнзуршчыну. Я яму сказала, каб размаўляў чалавечай мовай».
У РУУС Валянціна перажывала за сына, які ня ведаў, што зь ёю. Адваката да яе так і ня выклікалі, хоць дамову зь ім сфатаграфавалі.
У справе Валянціны быў яе фатаздымак з плякатам, раздрукаваны з тэлеграм-каналу Nexta. Без адваката Валянціна размаўляць у РУУС адмовілася, як адмовілася і падпісваць пратакол апытаньня. Але напісала сваёй рукой тлумачэньні.
«Напісала пра выкраданьне, пра мат, пра адмову выклікаць адваката, — кажа яна. — І пасьля давялося падпісаць пратакол. Я яшчэ напісала, што ажыцьцяўляла сваё канстытуцыйнае права выказваць сваю пазыцыю».
Валянціна зьдзіўляецца, што яе адзіночны непрацяглы пікет выклікаў такую рэакцыю «адказных асобаў».
«Гэта да чаго трэба давесьці краіну, каб амаль месяц усе праваахоўныя органы лавілі не бандытаў, а абсалютна мірных людзей, такіх, як я, студэнтаў, старых, малых. Больш няма чаго рабіць, як лазіць па стэлах, здымаць сьцягі з гаўбцоў, зафарбоўваць малюнкі на сьценах і прыбіраць кветкі з мэмарыялу Тарайкоўскага на Пушкінскай».
Выкладчыца будзе падаваць скаргі на дзеяньні праваахоўных органаў.
Валянціна Голубева — вядомая выкладчыца ангельскай мовы, арганізатарка шматлікіх мерапрыемстваў для настаўнікаў, выкладчыкаў, удзельніца міжнародных канфэрэнцый.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў