Лінкі ўнівэрсальнага доступу

У Францыі арыштаваны Фэлісьен Кабуга — за генацыд у Руандзе


Газэта з аб'явай пра вышук Фэлісьена Кабугі. Найробі, 12 чэрвеня 2002 году

У ваколіцах Парыжу 16 траўня затрымалі аднаго з галоўных абвінавачаных у датычнасьці да генацыду народа тутсі ў Руандзе ў 1994 годзе — Фэлісьена Кабугу.

Ён жыў у парыскім прыгарадзе з падробнымі дакумэнтамі і знаходзіўся ў міжнародным вышуку больш за 20 гадоў.

Француская паліцыя арыштавала Кабугу ў выніку сакрэтнай, старанна скаардынаванай апэрацыі з адначасовымі ператрусамі на некалькіх адрасах, дзе мог знаходзіцца 84-гадовы уцякач.

Кабуга быў кіраўніком «Свабоднага радыё і тэлебачаньня тысячы пагоркаў», якое распаўсюджвала заклікі да забойстваў тутсі. Ён узначальваў і Фонд нацыянальнай абароны, які зьбіраў сродкі на куплю зброі для баявых атрадаў.

У ліпені 1994 года Кабуга паспрабаваў знайсьці прытулак у Швайцарыі, але быў высланы ў Дэмакратычную Рэспубліку Конга. У 1997 годзе яго бачылі ў кенійскай сталіцы Найробі, дзе двойчы беспасьпяхова спрабавалі затрымаць, паведамляе RFI.

Кабуга будзе экстрадаваны ў Гаагу. Паколькі праца Міжнароднага трыбуналу ў справе Руанды была завершана ў 2015 годзе, справу Кабугі будзе разглядаць Міжнародны рэшткавы мэханізм крымінальных трыбуналаў.

Паводле дадзеных ААН, ахвярамі генацыду народа тутсі ў Руандзе сталі ад 800 тысяч да аднаго мільёна чалавек, што склала прыкладна адну пятую частку насельніцтва краіны.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG