Беларускае таварыства Чырвонага Крыжа запусьціла новую кампанію збору прадуктовых набораў для людзей з павышанай рызыкай заражэньня новым каранавірусам, піша БелТА.
Каранавірус у Беларусі і ў сьвеце. Як разьвіваюцца падзеі >>
Ужо цяпер Чырвоны Крыж дапамог 7841 пажылому чалавеку, у тым ліку за месяц выканаў 3117 просьбаў даставіць рэцэпты, 1895 — даставіць харчы і прадметы першай неабходнасьці, 2829 разоў дапамог пры іншых патрэбах, у тым ліку пры плаце за камунальныя паслугі. Мэдыкам перадалі некалькі тысяч масак, бутэлек антысэртыку і іншай дапамогі.
Новую акцыю назвалі «Добры box»: разам з партнэрамі са сфэры гандлю зьбіраюць харчовыя наборы, каб уразьлівыя да каранавірусу не хадзілі самі ў крамы, дзе могуць заразіцца. Ля ўваходаў у гандлёвыя пункты будуць ставіць банэры, а ў кошыкі класьці ўлёткі пра акцыю.
Звычайныя наведнікі крамаў могуць закупіць пэўны прадуктовы набор, пакласьці яго ў спэцыяльную каробку і перадаць праз інфацэнтар Чырвонаму Крыжу. Той, у сваю чаргу, даставіць харчы пажылым, інвалідам і іншым, хто мае патрэбу ў дапамозе. Кампанія будзе доўжыцца да 31 траўня.
Акрамя таго, Чырвоны Крыж бярэ ўдзел у акцыі «Мэдабед» — служба Catering Stolitsa пры ўдзеле валянтэраў раз на тыдзень дастаўляе мэдыкам 4-й менскай лякарні гарачыя абеды.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў