Ці праўда, што Беларусь — у 20-ы самых буйных у сьвеце экспартэраў зброі?

Насамрэч

Чыстая праўда.

Пра гэта сьведчыць апошняя справаздача Стакгольмскага інстытуту дасьледаваньня праблемаў міру (SIPRI). Паводле яе вынікаў, у 2015-2019 годзе Беларусь была на 20-м месцы сярод краінаў — найбуйнейшых экспартэраў зброі, знаходзілася ў сьпісе паміж Аўстраліяй і Чэхіяй. На Беларусь прыпадала 0.3% усясьветнага экспарту ўзбраеньняў.

Першыя месцы ў сьпісе найбуйнейшых экспартэраў зброі ў сьвеце займаюць ЗША (36% усясьветнага збройнага экспарту) і Расея (21%). Сярод суседзяў Беларусі больш высокае месца, чым яна, у рэйтынгу збройных экспартэраў займае ня толькі Расея, але і Ўкраіна (12-е месца, 1% усясьветнага экспарту ўзбраеньняў).

Астатнія суседзі Беларусі не трапляюць у сьпіс нават першых 25 найбуйнейшых экспартэраў зброі.