Кіраўнік кампаніі Facebook Марк Цукербэрг апублікаваў у Instagram фота і відэа зь Елаўстоўнскага парку. МЗС Беларусі запрасіў яго паглядзець на зуброў і праграмістаў.
Цукербэрг пабачыў і зьняў на відэа бізона ў засьнежаным Елаўстоўнскім парку, што ў штаце Ваёмінг (другое відэа ў пасьце). Таксама ён апублікаваў кадры з гарачымі азёрамі, каньёнам і гарамі.
Афіцыйны акаўнт Міністэрства замежных справаў Беларусі пракамэнтаваў пост мільярдэра:
«Вельмі ўражвае! — піша МЗС Цукербэргу. — У нас таксама ёсьць выдатныя зубры ў Белавескай пушчы, у Беларусі! Дарэчы, калі вам спадабаўся MSQRD, ставім на тое, што вы знойдзеце, што наведаць у беларускім Парку высокіх тэхналёгіяў! Варта падумаць :)».
Пад тым, што «Цукербэгру спадабаўся MSQRD», МЗС мае на ўвазе тое, што ў 2016 годзе Facebook набыў беларускую кампанію Masquerade, якая распрацавала праграму MSQRD. Суму ўгоды тады не называлі, але гаворка ішла пра дзясяткі мільёнаў даляраў.
Месяц таму МЗС запрашаў у Белавескую пушчу іншага вядомага амэрыканца: актора Джарэда Падалецкага, які пажартаваў, што гэта ён прыдумаў дызайн старых беларускіх рублёў. Праўда, Падалецкага запрашалі паглядзець не на зуброў, а на ласёў.
МЗС публікуе ня ўсе пасты амэрыканскіх зорак, дзе можна пабачыць прывязку да Беларусі. Так, МЗС не адрэагаваў на пост актора Ўіла Сьміта, дзе той заклікаў адказна спажываць алькаголь і ілюстраваў заклік кадрамі «танкавага дрыфту» ў Менску.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў