Беларусам прапануюць далучыцца да глябальнага вывучэньня ўплыву каранавірусу на фізычнае і псыхічнае здароўе

Як адзначаюць ініцыятары глябальнай дасьледчай кампаніі, да супольнай справы далучыліся амаль 200 навукоўцаў з больш як 40 дзяржаваў. Ад беларускага боку ў праекце задзейнічаны псыхатэрапэўт Алег Айзбэрг.

Веды, атрыманыя ў выніку дасьледаваньня, дапамогуць больш эфэктыўна падтрымліваць людзей падчас эпідэмій, а таксама вызначыць, хто больш уразьлівы да праблемаў, зьвязаных зь фізычным і псыхічным здароўем. Цалкам чытайце тут.

«За нашу бязьдзейнасьць падчас пандэміі заплацяць жанчыны і дзеці», — прэзыдэнтка Эстоніі

Прэзыдэнтка Эстоніі Кэрсьці Кальюлайд разам з былой прэм’ер-міністаркай Новай Зэляндыі Гэлен Кларк, міністрам здароўя Мэксыкі Хорхэ Алькасэрам Варэля і былым чальцом праўленьня Партнэрства ў ахове здароўя маці, нованароджаных і дзяцей САЗ Грасай Машэл прааналізавалі наступствы эпідэміі каранавірусу ў калёнцы на сайце САЗ.

На думку чацьвярых аўтараў, у першую чаргу пандэмія прывядзе да росту дзіцячай сьмяротнасьці, ад 42 да 66 мільёнаў дзяцей апынуцца ў сытуацыі крайняй галечы па ўсім сьвеце. Асноўныя тэзісы і высновы чытайце па спасылцы.

Беларусь у лідэрах распаўсюду COVID-19: 22-я ў сьвеце па выяўленых выпадках, 16-я ў выпадках на душу насельніцтва

Афіцыйна прызнаныя 38 956 выпадкаў COVID-19 у Беларусі — 22-е месца ў сьвеце паводле распаўсюду новага каранавірусу. Беларусь ужо абагнала Швэцыю, Партугалію, Швайцарыю, Польшчу, Украіну і многія іншыя эўрапейскія краіны.

Паводле колькасьці выпадкаў на душу насельніцтва Беларусь на 16-м месцы ў сьвеце і 10-м у Эўропе: 4140 выпадак на мільён чалавек. Калі адкінуць мікрадзяржавы з насельніцтвам менш за 100 тысяч чалавек (Сан-Марына, Ватыкан, Андору і Гібральтар), Беларусь становіцца на 12-е месца ў сьвеце і 6-е ў Эўропе паводле распаўсюду COVID-19 на душу насельніцтва.

Пры тым у Беларусі прызналі толькі 214 сьмерцяў (22,75 на мільён), і гэта толькі 67-е месца ў сьвеце і 37-е ў Эўропе (менш у Баўгарыі, Грэцыі, Мальце, Украіне, Чарнагорыі, Латвіі, Альбаніі і Славакіі). Паводле суадношаньня прызнаных сьмерцяў да выяўленых выпадкаў COVID-19 Беларусь на 17-м месцы ў сьвеце (без уліку краінаў, дзе не прызналі ніводнай сьмерці).

«На ШВЛ татка прабыў паўгадзіны да сьмерці». Жыхар Гомля лячыў анкалёгію і заразіўся COVID-19

Жыхар Гомля Яўген Якавенка плянава лячыў анкалёгію і заразіўся ў шпіталі COVID-19. Яго пераводзілі са шпіталя ў шпіталь, ён трапіў у рэанімацыю, расказаў Свабодзе сын нябожчыка Яўген Якавенка (малодшы). «Татка толькі паўгадзіны пабыў на апараце штучнай вэнтыляцыі лёгкіх (ШВЛ) — і яго ня стала. Каб не каранавірус — ён бы жыў». Яўгену Якавенку (старэйшаму) было 68 гадоў. Чытайце гісторыю Яўгена па спасылцы.

«Па сутнасьці, ідзе нябачная вайна». Як актор Аляксандар Ждановіч (Маляваныч) перажыў каранавірус

Актор менскага драматычнага тэатру імя Горкага Аляксандар Ждановіч, той самы Маляваныч з «Калыханкі», перахварэў на COVID-19. Сёньня ўпершыню пасьля шпіталя і ізаляцыі выехаў на лецішча, каб пакасіць, спраўдзіць, як квітнее сад і як узышла цыбуля.

У размове з карэспандэнтам Свабоды Аляксандар Ждановіч расказаў пра свой «суб’ектыўны вопыт» ад перажытай інфэкцыі. Чытайце па спасылцы >>

«У людзей, якія аказвалі рэгулярную дапамогу, не хапае сродкаў», — стваральніца плятформы «Имена» пра дабрачыннасьць у часы COVID-19

Больш як два месяцы маштабныя праекты дзеля барацьбы з каранавірусам стварае і рэалізуе онлайн-плятформа «Имена». Яе заснавальніца Кацярына Сінюк расказала Свабодзе пра розныя кірункі дапамогі, пра тое, як у грамадзтве мяняецца стаўленьне да дабрачыннасьці, а таксама выказала занепакоенасьць тым, што ў часе пандэміі істотна зьнізілася дапамога іншым праектам для самых уразьлівых, якія не зьвязаныя наўпрост з COVID-19.

Сьцісла

• За той час, што я працую ў «Именах», ніколі не было так, каб практычна ўся краіна займалася дабрачыннасьцю.
• Збольшага дактары адэкватна ацанілі сытуацыю і прымалі дапамогу зь вялікай удзячнасьцю, але некаторыя баяліся, што да іх прыйдуць і скажуць, што нешта ня так аформілі.
• Паступленьні ад бізнэсу ўтрая зьменшыліся на праекты, не зьвязаныя з каранавірусам. Упершыню мы сутыкнуліся з тым, што ў людзей, якія аказвалі рэгулярную дапамогу, не хапае сродкаў на картках.
• Пракапеня расказваў, як нейкая кампанія патраціла сотні тысяч даляраў, каб высьветліць, на які банэр карыстальнікі клікаюць больш. Сотні тысяч даляраў трэба ўкладаць у здароўе і адукацыю.

Цалкам чытайце па спасылцы.

У Івейскім раёне ўвялі абавязковы масачны рэжым

У Івейскім раёне насельніцтва абавязалі выкарыстоўваць маскі ў грамадзкіх месцах. Кіраўніцтву кампаній і прадпрыемстваў забаранілі абслугоўваць наведнікаў бяз масак.

Таксама з улікам мераў сацыяльнага дыстанцыяваньня абмежавалі колькасьць наведнікаў, якія адначасова знаходзяцца ў:

• гандлёвых абʼектах;
• месцах грамадзкага харчаваньня;
• аптэках;
• банкаўскіх аддзяленьнях,
• аддзяленьнях сувязі і інш.

ФАКТОГРАФ. Ці праўда, што Біл Гейтс хоча выкарыстаць пандэмію для «мікрачыпаваньня» насельніцтва?

Сузаснавальнік Microsoft Біл Гейтс раней згадаў «пасьведчаньні аб імунітэце», пасьля чаго ў некаторых супольнасьцях загаварылі, што праект прадугледжвае ўжыўленьне людзям «мікрачыпаў», якія пакажуць, хто быў правераны на каранавірус. Наколькі гэта адпавядае рэчаіснасьці?

Лічбы на раніцу 28 траўня

• У сьвеце зафіксавалі звыш 5,79 мільёна выпадкаў COVID-19: 1,746 млн у ЗША, 414,6 тысячы ў Бразыліі, 370,7 тысячы ў Расеі, амаль 284 тысяч у Гішпаніі, звыш 267 тысяч у Вялікай Брытаніі, звыш 231 тысячы ў Італіі.
• Ад хваробаў, якія выклікаў новы каранавірус, у сьвеце прызнаныя сьмерці 357,4 тысячы чалавек. Зь іх 102 107 у ЗША, 37 460 у Вялікай Брытаніі, 33 072 у Італіі, 28 596 у Францыі, 27 118 у Гішпаніі, 25 697 у Бразыліі.
• Выпісалі 2,5 мільёна пацыентаў, якіх вылекавалі ад COVID-19. «Актыўных выпадкаў» хваробы застаецца 2,9 млн, зь іх 53 тысячы ў цяжкім ці крытычным стане.

COVID-19 прызналі ў Беларусі падставай да вызваленьня ад школьных іспытаў

Міністэрства аховы здароўя Беларусі прыняла пастанову аб зьменах у пераліку «хваробаў, якія зьяўляюцца мэдычнай падставай для вызваленьня вучняў ад выпускных іспытаў». Да сьпісу дадалі «інфэкцыю, выкліканую каранавірусам COVID-19». Тэкст быў афіцыйна апублікаваны і набыў моц 28 траўня.

У Беларусі раней вырашылі адкласьці ўступную кампанію ў сувязі з каранавірусам, даты цэнтралізаванага тэставаньня зьмянілі на тыдзень ці два.

Графік выпускных іспытаў у школах можа быць трохі адкарэктаваны ў залежнасьці ад зьместу прадметаў. Што да выпускных вечароў у школах, Мінадукацыі прапануе вырашаць гэта пытаньне індывідуальна ў кожнай навучальнай установе.

На Petitions.by зьбіралі подпісы за скасаваньне выпускных і перанос уступных іспытаў у Беларусі. 27 траўня зварот з амаль 10 тысячамі подпісаў адправілі ў Міністэрства адукацыі і Адміністрацыю прэзыдэнта.

Дэпартамэнт ядзернай бясьпекі «бязьдзейнічае» на фоне каранавірусу, — «Экадом»

Грамадзкае аб'яднаньне «Экадом» выказаа занепакоенасьць бязьдзейнасьцю дэпартамэнту ядзернай і радыяцыйнай бясьпекі Міністэрства надзвычайных сытуацыяў (Дзяржатамнагляд) на фоне зьяўленьня інфармацыі аб распаўсюдзе COVID-19 на Беларускай АЭС.

Напярэдадні, нагадалі экалягічныя актывісты, генэральны дырэктар расейскай дзяржаўнай карпарацыі «Росатом» Аляксей Ліхачоў заявіў, што «на будаўніцтве БелАЭС прыблізна 100 работнікаў інфікаваныя вірусам COVID-19», а таксама «выказаўся аб неабходнасьці ўзмацненьня ахоўных захадаў і паведаміў пра тое, што празь некалькі тыдняў чакаецца выдача ліцэнзіі на эксплюатацыю першага энэргаблёка электрастанцыі і яго фізычны пуск».

«Нас глыбока трывожыць гэтая сытуацыя, якая характарызуецца ў першую чаргу бязьдзейнасьцю нацыянальнага рэгулятара, закліканага кантраляваць будаўніцтва і арганізоўваць бясьпеку функцыянаваньня атамнай электрастанцыі, — гаворыцца ў звароце. — Яшчэ ў красавіку сёлета наша арганізацыя выказала асьцярогі ў сувязі з распаўсюджваньнем каранавіруснай інфэкцыі сярод занятых на будаўніцтве БелАЭС і мясцовых жыхароў, уключаючы жыхароў Астравецкага раёну.

Чытаць далей >>

«Я што, не чалавек? Ня маю права захварэць?», — кіраўнік Чачэніі Кадыраў пра каранавірус

Рамзан Кадыраў, кіраўнік Чачэнскай рэспублікі ў складзе Расеі, увечары 27 траўня ўпершыню асабіста пракамэнтаваў інфармацыю пра тое, ці хварэў ён COVID-19. Наўпрост на пытаньне пра магчымасьць захворваньня на каранавірусную інфэкцыю ён так і не адказаў. Ён заявіў, што «абсалютна здаровы», а ў Маскве нібыта быў на дыспансэрызацыі.

«Калі нават я захварэў. У сьвеце мільёны людзей заражаныя каранавірусам, дзясяткі тысяч памерлі, я што, не чалавек? Ня маю права захварэць? Ня маю права паставіць кропельніцу і падняць імунітэт? Я абсалютна здаровы чалавек», — заявіў Кадыраў.

Экспэрты Эўразьвязу ўсумніліся ў эфэктыўнасьці закрыцьця межаў

Эўрапейскі цэнтар прафіляктыкі і кантролю захворваньняў (ECDC) узяў пад сумнеў эфэктыўнасьць закрыцьця межаў для барацьбы з распаўсюджваньнем каранавіруснай інфэкцыі. Даклад выйшащ у момант, калі краіны Эўразьвязу абмяркоўваюць магчымасьць зьняцьця некаторых абмежаваньняў на паездкі, уведзеных на першым этапе эпідэміі ў Эўропе, піша Reuters.

Экспэрты адзначаюць, што закрыцьцё межаў прывяло да вельмі нэгатыўных наступстваў для эканомікі, але толькі адтэрмінавала эпідэмію ў самым яе пачатку.

У Маскве дазволілі гуляць «паводле графіку» з 1 чэрвеня, але «рэжым самаізаляцыі» прадоўжаны да 14 чэрвеня

Мэр Масквы Сяргей Сабянін сказаў падчас нарады з прэзыдэнтам Расеі Ўладзімірам Пуціным, што з 1 чэрвеня ў Маскве будуць паслабленыя карантынныя абмежаваньні.

Паводле Сабяніна, з 1 чэрвеня:

• будуць адкрыты ўсе нехарчовыя крамы, у тым ліку аўтасалёны, адкрыецца частка майстэрняў і прадпрыемстваў бытавых паслуг (пральні, хімчысткі, рамонтныя майстэрні);

• адноўляць працу кірмашы выхаднога дня;

• у тэставым рэжыме будзе працаваць «графік выхаду на прагулкі для грамадзян» і будуць дазволеныя заняткі спортам на вуліцах;

• будуць адкрыты паркі і сквэры, але ў іх пакуль не будуць працаваць атракцыёны, дзіцячыя і спартыўныя пляцоўкі. Таксама пакуль нельга будзе карыстацца лавачкамі, альтанкамі і іншымі падобнымі аб’ектамі.

«Рэжым самаізаляцыі» працягне дзейнічаць: ён падоўжаны мінімум да 14 чэрвеня. Але жыхарам старэйшыя за 65 гадоў дазволена будзе выходзіць на вуліцу паводле графіку.

Па словах мэра, «сытуацыя з захворваньнем на каранавірусную інфэкцыю ў Маскве ня толькі стабілізавалася, але і палепшылася». Таму, паводле яго, можна «зрабіць як бы графік, калі грамадзяне, якія пражываюць у тых ці іншых дамах, могуць выходзіць на прагулкі».

Масквічам дазволяць гуляць па графіку толькі тры разы на тыдзень: два разы ў працоўныя дні і адзін раз у выходны. На сьвітаньні (зь пяці да дзевяці раніцы) кожнага дня — без абмежаваньняў. Графік прагулак для кожнага дома будзе вывешаны на сайце mos.ru.

Афіцыйная статыстыка COVID-19 у Беларусі на 28 траўня

Паводле міністэрства аховы здароўя, на 28 траўня ў Беларусі:

• агулам 39 858 чалавек са станоўчым тэстам на COVID-19 (у іх лік уваходзяць тыя, хто паправіўся і хто памёр);
• 215 памерлых, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія ​родзічы памерлых кажуць, што гэта ня так — паміралі і без хранічных хваробаў);
• 16 660 пацыентаў паправіліся і выпісаныя пасьля COVID-19;
• гэта значыць, за дзень выявілі яшчэ 902 выпадкі і прызналі яшчэ 5 сьмерцяў, выпісалі 737 чалавек;
• ад пачатку эпідэміі ў краіне зрабілі 499 249 тэстаў (13 715 за дзень);
• колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляецца.

На вэбінары рэаніматолягаў 22 траўня лекары паказвалі статыстыку, зь якой вынікала, што толькі ў менскіх рэанімацыях за красавік памерлі 117 інфікаваных COVID-19, хоць Міністэрства здароўя на 1 траўня прызнавала толькі 93 сьмерці па ўсёй краіне. Пасьля Міністэрства здароўя стала заяўляць, што гэтыя лічбы «няправільна інтэрпрэтавалі».

Беларускія лекары ананімна заяўляюць, што ня ўсім хворым ставяць адпаведны дыягназ, а мэдыкам бракуе сродкаў засьцярогі. У рытуальным агенцтве кажуць, што ў памерлых часьцей пазначаны дыягназ «неўдакладненая пнэўманія», а не «каранавірус». Міністэрства аховы здароўя не залічвае да памерлых ад COVID-19 тых, у каго вірус «элімінавалі», а яны ўсё роўна памерлі. У афіцыйнай статыстыцы колькасьці зробленых тэстаў раней была анамалія — нібыта за 4 траўня зрабілі 0 тэстаў і выявілі 861 новы выпадак.

Хоць Аляксандар Лукашэнка і прадстаўнікі Міністэрства здароўя заяўляюць пра «выхад на плято», колькасьць хворых нават у статыстыцы ейнага міністэрства няспынна расьце.

Тры месяцы з каранавірусам. 10 фактаў пра COVID-19 у Беларусі

Першы выпадак каранавіруснай інфэкцыі COVID-19 быў зафіксаваны ў Беларусі тры месяцы таму: 28 лютага стала вядома, што хваробу выявілі ў студэнта БНТУ з Ірану. Ён ужо паправіўся і нават ажаніўся. Але вірус працягвае пашырацца і ў Беларусі, і ў астатнім сьвеце.

Сьцісла. Вакцынаў і лекаў няма. Некаторыя краіны ўжо перамаглі або амаль перамаглі каранавірус, але Беларусь ня ў іх ліку. Беларусь ня ўводзіла амаль ніякіх карантынных захадаў. Статыстыка каранавірусу ў Беларусі мае шмат анамаліяў. Эпідэміялягічны прагноз уладаў Беларусі не пацьвярджаецца. Трактары і козачкі — «лекі Лукашэнкі ад каранавірусу». Беларускія мэдыкі не задаволены надбаўкамі і ўмовамі працы.

Чытаць цалкам >>

Мінус 8,9 мільярда рублёў у параўнаньні зь мінулым годам. Як беларускія прадпрыемствы працуюць ва ўмовах пандэміі

5,8 мільярдаў рублёў — гэта чыстыя страты ўсіх буйных і сярэдніх прадпрыемстваў Беларусі са студзеня па красавік 2020 году. Летась за такі ж пэрыяд яны спрацавалі з чыстым прыбыткам у 3,1 мільярда рублёў. Глядзім, чаму так атрымалася і каго напаткаў найбольшы крызіс. Чытайце артыкул па спасылцы.

Кампанія #ByCovid19 сабрала на дапамогу беларускім мэдыкам 300 тысяч даляраў

Адзін з ініцыятараў грамадзянскай кампаніі #ByCovid19 Андрэй Стрыжак расказаў на Facebook пра вынікі працы за два месяцы: на дапамогу беларускім мэдыкам сабралі 302 619 даляраў.

Гэта пяць тысяч даляраў на дзень або дзьвесьце даляраў на гадзіну, адзначае Стрыжак. З гэтай сумы 58 957 даляраў унесла беларуская дыяспара з-за мяжы. «Узгадайце гэта кожны раз, калі хтосьці скажа, што беларусы ня здольныя на салідарнасьць і ўзаемадапамогу», — дадае ён. Цалкам чытайце тут.

Беларусу, які вінаваціў Лукашэнку ў сьмерці маці ад COVID-19, адмовілі ў крымінальнай справе

Аляксандру Мацьвееву, маці якога памерла ад COVID-19, адмовілі ў завядзеньні крымінальнай справы. Ён даведаўся пра гэта па тэлефоне ў міліцыі. Мацьвееў вінаваціў Лукашэнку ў бязьдзеяньні службовай асобы падчас пандэміі каранавірусу.

Афіцыйная прадстаўніца УУС Віцебскага аблвыканкаму Вольга Шкуратава пацьвердзіла Радыё Свабода, што праверку скончылі, яе вынікі накіравалі Мацьвееву на пазначаны адрас.

Беларусь увайшла ў пяцёрку краін Эўропы з найбольшай колькасьцю выпадкаў COVID-19 за апошнія 2 тыдні

Беларусь увайшла ў пяцёрку краін Эўропы з найбольшай колькасьцю зарэгістраваных выпадкаў заражэньня COVID-19 за апошнія два тыдні, паведаміў 28 траўня дырэктар Эўрапейскага рэгіянальнага бюро Сусьветнай арганізацыі здароўя Ганс Клюге.

Акрамя Беларусі, у першую пяцёрку ўвайшлі Расея, Вялікая Брытанія, Турэччына і Італія.

Усяго ў зоне адказнасьці эўрапейскага бюро САЗ 53 краіны з насельніцтвам каля 900 мільёнаў чалавек, у якіх пацьверджана больш за 2 мільёны выпадкаў заражэньня каранавірусам і зафіксавана звыш 175 тысяч сьмерцяў ад COVID-19.