«Белавія» адмяніла рэйсы ў Жэнэву, Манчэстэр, Ніцу, Варонеж, Казань і Ніжні Ноўгарад да 24 кастрычніка

Беларуская авіякампанія «Белавія» абвясьціла аб скасаваньні шэрагу палётаў да канца сэзону Міжнароднай асацыяцыі авіятранспарту (IATA). Да 24 кастрычніка ня будзе палётаў у:

• Манчэстэр (Вялікая Брытанія) — ад 6 траўня;
• Ніцу (Францыя) — ад 10 траўня;
• Жэнэву (Швайцарыя) — ад 18 траўня;
• Варонеж, Казань, Ніжні Ноўгарад (Расея) — рэйсы ўжо былі скасаваныя раней па 11 траўня.

«Белавія» ня будзе абслугоўваць пасажыраў бяз масак.

Кітайскім кінатэатрам дазволілі аднавіць працу

Кітайскім кінатэатрам дазволілі аднавіць працу пасьля больш як трох месяцаў карантыну пры ўмове выкананьня санітарных мер.

Аднак у пастанове Дзяржаўнага савету Кітая не называецца дакладная дата, зь якой кінатэатры могуць аднавіць працу.

Пляцоўкі, якія адновяць працу, мусяць рассаджваць гледачоў на бясьпечнай адлегласьці, як можна часьцей праветрываць памяшканьні, рэгулярна праводзіць прыборку і дэзынфэкцыю. Гледачоў абавяжуць насіць ахоўныя маскі.

Дзяржсавет Кітая таксама заклікаў аднавіць працу рэстарацыяў, супэрмаркетаў і гандлёвых цэнтраў.

Tesla падала ў суд на мясцовыя ўлады — патрабуе адкрыць завод кампаніі ў Каліфорніі

Амэрыканскі вытворца электрамабіляў Tesla падаў у суд на ўлады каліфарнійскай акругі Аламіда з патрабаваньнем адкрыць закрыты праз карантын завод у горадзе Фрымант.

Заснавальнік кампаніі Ілан Маск паабяцаў у твітэры перанесьці яе штаб-кватэру з Каліфорніі ў іншы штат.

Каліфорнія зьняла шэраг абмежаваньняў, выкліканых пандэміяй каранавірусу. Аднак частка паўнамоцтваў у выбары карантыннага рэжыму перададзеныя акруговым уладам.

8 траўня кампанія плянавала вывесьці на працу да 30% супрацоўнікаў, аднак ня можа гэтага зрабіць. На думку Маска, Tesla здольная засьцерагчы супрацоўнікаў лепш, чым не абраны нікім супрацоўнік акруговай установы аховы здароўя. Ён нагадаў, што ягоная кампанія — найбуйнейшы прамысловы вытворца ў штаце.

Чэхія больш не зьбіраецца падаўжаць надзвычайнае становішча

Чэскі ўрад не плянуе падаўжаць дзеючы ў краіне з 12 сакавіка рэжым надзвычайнай сытуацыі, тэрмін якога заканчваецца 17 траўня. Пра гэта паведаміў у нядзелю ў прэм’ер-міністар краіны Андрэй Бабіш.

Паводле кіраўніка ўраду, у выпадку пагаршэньня ў рэспубліцы эпідэміялягічнай сытуацыі змогуць апэратыўна ўводзіць сацыяльныя абмежавальныя меры на аснове спэцыяльнага закона, які неўзабаве павінен быць прыняты парлямэнтам. Ён, як чакаецца, значна ўзмоцніць кампэтэнцыі міністэрства аховы здароўя да канца бягучага года.

Улады абмяркоўваюць магчымасьць дазволіць жыхарам рэспублікі не насіць мэдыцынскія маскі на адкрытых прасторах. Абавязак засьцерагаць органы дыханьня ад каранавіруса захаваецца толькі ў грамадзкіх памяшканьнях, якімі, напрыклад, зьяўляюцца крамы, і ў грамадзкім транспарце.

У Нямеччыне ўсьлед за паслабленьнем абмежаваньняў — рост колькасьці заражэньняў

У Нямеччыне адзначана павелічэньне колькасьці інфікаваных, сьведчыць афіцыйная статыстыка. Рост рэгіструецца празь некалькі дзён пасьля першых крокаў нямецкіх уладаў у бок паслабленьня абмежавальных мер, адзначае Бі-бі-сі.

Паводле дадзеных інстытута Робэрта Коха, індэкс рэпрадукцыі каранавіруса ў Нямеччыне ў цяперашні час знаходзіцца вышэй «адзінкі». Гэта азначае, што ў краіне адбываецца рост колькасьці інфікаваных.

Публікацыя гэтых зьвестак супала ў Нямеччыне з масавымі акцыямі пратэсту, удзельнікі якіх у суботу ў некалькіх гарадах краіны сталі сотні і тысячы чалавек.

Лічбы на раніцу 11 траўня

• У сьвеце зафіксавалі звыш 4,18 мільёна выпадкаў COVID-19: звыш 1,36 млн у ЗША, каля 264,5 тысячы ў Гішпаніі, па 219 тысяч у Італіі і Вялікай Брытаніі, 209,5 тысячы ў Расеі, 177 тысяч у Францыі, каля 172 тысяч у Нямеччыне, звыш 152,5 тысячы ў Бразыліі, звыш 138,5 тысяч у Турэччыне, звыш 107,5 тысячы ў Іране.
• Ад хваробаў, якія выклікаў новы каранавірус, у сьвеце прызнаныя сьмерці 283 868​ чалавек. Зь іх 80 787 у ЗША, 31 855 у Вялікай Брытаніі, 30 560 у Італіі, 26 621 у Гішпаніі, 26 380 у Францыі.
• Выпісалі звыш 1,49 мільёна пацыентаў, якія паправіліся ад COVID-19. «Актыўных выпадкаў» хваробы застаецца каля 2,4 млн, зь іх звыш 47 тысячы ў цяжкім ці крытычным стане.

Канскі кінафэстываль адмянілі праз пандэмію COVID-19

У Францыі абвясьцілі пра скасаваньне правядзеньня Канскага кінафэстывалю ў намечаныя раней тэрміны. Чакалася, што 73-й Канскі кінафэстываль пачнецца на Блакітным беразе 12 траўня. Затым, у сувязі з пандэміяй каранавірусу тэрміны былі ссунутыя на чэрвень.

У нядзелю, 10 траўня, арганізатары фэстывалю заявілі, што ён адмяняецца, «але не сыходзіць». У якім выглядзе захаваецца фэстывальная праграма, яго конкурсныя і пазаконкурсныя падзеі, застаецца пакуль незразумелым.

Аптымісты гавораць аб магчымым правядзеньні фэстывалю ў кастрычніку. Пэсымісты лічаць, што наступны фэстываль, магчыма, будзе праведзены ў 2021 годзе.

Партыі БНФ і «Справядлівы сьвет» адмовіліся ўдзельнічаць у выбарах праз каранавірус

Выбары прэзыдэнта Беларусі прызначылі на 9 жніўня, сьпісы ініцыятыўных груп трэба падаць да 15 траўня.

Партыя БНФ выдала заяву сойму па выніках інтэрнэт-паседжаньня 10 траўня: «Уцягваць людзей у выбарчае махлярства падчас пандэміі — двайное злачынства». Падобную заяву 10 траўня выдала партыя «Справядлівы сьвет»: правядзеньне выбараў ва ўмовах пандэміі «безадказнае і злачыннае».

Але шэраг палітыкаў зьбіраецца на выбары: Сяргей Чэрачань з БСДГ, Алег Гайдукевіч з ЛДПБ, Андрэй Дзьмітрыеў з «Гавары праўду» і іншыя. Мікола Статкевіч і ўдзельнікі праймэрыз зьбіраюцца выкарыстаць выбары для пратэсту.

Вакаліст Gods Tower: Чакалі вулічнага зомбі-апакаліпсісу, а апынуліся пад хатнім арыштам

«Улада — гэта калі нехта вырашае і бярэ на сябе адказнасьць. А нашыя што зрабілі? Толькі ўсё сапсавалі! Таму ў нас ня ўлада, а безуладзьдзе».

Лідэр гурту Gods Tower расказаў, чым лагодзіць самаізаляцыю ў краіне, дзе няма карантыну. Стаў мотааматарам, слухае лекцыі па антрапалёгіі. Музыка праз чат, уласныя праекты на паўзе.

Чытаць цалкам >>

«Пакуль не змаглі выехаць». Што адбываецца зь дзецьмі, якім зьбіралі грошы на лячэньне за мяжой, а межы закрытыя?

Ці ня сталі беларусы больш чэрствымі да чужой бяды? Свабода паразмаўляла з кіраўнікамі дабрачынных фондаў, якія цяпер ня могуць накіраваць дзяцей за мяжу. Але працягваюць працаваць.

«Межы закрытыя, замежныя клінікі цяпер не прымаюць пацыентаў. Таму дамаўляемся на пазьнейшы пэрыяд. Мы знаходзімся ў рэжыме чаканьня», — кажуць у адной з дабрачынных арганізацыяў UNIHELP.

Рэктар Жыровіцкай сэмінарыі выпісаўся зь лякарні пасьля пнэўманіі з падазрэньнем на каранавірус

Дваццаць дзён таму 63-гадовага архіяпіскапа Наваградзкага і Слонімскага Гурыя, рэктара Жыровіцкай сэмінарыі (сьвецкае імя — Мікалай Апалька) шпіталізавалі з пнэўманіяй і падазрэньнем на каранавірус. 10 траўня Наваградзкая эпархія паведаміла, што Гурый прычасьціўся на нядзельнай літургіі.

«Яго Высокапраасьвяшчэнства знаходзіцца пакуль на рэабілітацыі, за ўсіх моліцца і, дасьць Бог, у недалёкім часе вернецца ў Сьвята-Ўсьпенскі Жыровіцкі манастыр, намесьнікам якога зьяўляецца, — піша эпархія. — Насельнікі манастыра, студэнты Менскай духоўнай сэмінарыі, паства зь нецярпеньнем чакаюць свайго архіпастыра».

Сам Гурый 10 траўня апублікаваў відэазварот да паствы — падзякаваў усім, хто за яго маліўся.

Ні з паведамленьня эпархіі, ні са звароту Гурыя невядома, ці пацьвердзілі ў яго COVID-19, або пнэўманія ўзьнікла зь іншай прычыны.

Пасьля Гурыя ў Жыровічах шпіталізавалі як «кантактаў 1-га ўзроўню» 41 чалавека, зь іх 23 — сэмінарысты. Сама меней у чатырох сэмінарыстаў пацьвердзілі каранавірус. Пра іхны стан таксама не паведамляецца.

21 красавіка стала вядома, што ў Жыровіцкім манастыры і ў доме паломнікаў да 10 траўня прыпынілі прыём наведнікаў. Прычына — эпідэміялягічная сытуацыя ў сьвеце. Ці аднавілі прыём наведнікаў 11 траўня, не паведамлялася.

Украіна ад 11 траўня паслабляе карантын. Але межы застаюцца закрытымі

Што стане даступным:

• Паркі, сквэры, зоны адпачынку.
• Дзіцячыя і спартовыя пляцоўкі.
• Рэстараны і кавярні змогуць адкрыць летнія тэрасы, але большасьць аб’ектаў грамадзкага харчаваньня будуць працаваць толькі на вынас ежы.
• Гандаль нехарчовымі таварамі ў гандлёва-забаўляльных цэнтрах.
• Музэі.
• Стаматалёгія.
• Салёны прыгажосьці і цырульні.
• Установы бытавога абслугоўваньня.
• Адновяць сваю дзейнасьць адвакаты, натарыюсы, аўдытары, псыхолягі.
• У тэатрах і іншых мастацкіх установах да 50 асобаў дазволена праводзіць відэаздымкі рэпэтыцый ды канцэртаў.

Што застанецца пад забаронай:

• Фудкорты і зоны адпачынку ў гандлёва-забаўляльных цэнтрах.
• Кінатэатры і тэатры.
• Грамадзкі транспарт (ім могуць скарыстацца толькі па спэцпропусках супрацоўнікі прадпрыемстваў крытычнай інфраструктры).
• Унутраны, чыгуначны і авіяцыйны транспарт.
• Спортзалі ды фітнэс-цэнтры.
• Унівэрсытэты, школы, дзіцячыя садкі.
• Правядзеньне масавых акцый.
• Перамяшчэньне групамі больш за 2 асобы.
• Знаходжаньне ў грамадзкіх месцах бяз маскі і дакумэнтаў.
• Самавольнае пакіданьне месцаў самаізаляцыі і абсэрвацыі.
• Знаходжаньне на вуліцы дзяцей да 14 гадоў без суправаджэньня дарослых.

Межы Ўкраіны застаюцца закрытымі для іншаземцаў — іх адкрыцьцё будзе адбывацца паступова, адначасова з аналягічнымі рашэньнямі эўрапейскіх краін.

Брытанцам ад серады дазволяць гуляць і займацца спортам у парках

Прэм’ер-міністар Вялікай Брытаніі Борыс Джонсан абвясьціў пра частковае паслабленьне карантынных захадаў, уведзеных у канцы сакавіка з прычыны пандэміі каранавірусу.

Напярэдадні вечарам у звароце да нацыі Джонсан паведаміў, што з панядзелка людзям, якія ня могуць працаваць з дому, будзе дазволена хадзіць на працу. Аднак, па магчымасьці, ня варта карыстацца грамадзкім транспартам.

Зь серады цалкам здымаюцца абмежаваньні на прагулкі і заняткі спортам на сьвежым паветры пры захаваньні дыстанцыі. Адначасова для парушальнікаў сацыяльнага дыстанцыяваньня ўводзяцца павышаныя штрафы — іх сума можа дасягаць больш за 3 тысячы фунтаў.

Паводле Джонсана, цяпер замест закліку «заставайцеся дома» ўводзіцца новы лёзунг: «Захоўвайце пільнасьць». Гаварыць аб зьняцьці карантынных захадаў або аб сур’ёзным паслабленьні абмежаваньняў пакуль рана, лічыць брытанскі прэм’ер. Крамы і школы змогуць адкрыцца не раней за 1 чэрвеня, а пабы, рэстараны і гатэлі — не раней за ліпень, адзначыў ён.

Афіцыйная статыстыка: шосты дзень запар больш як па 900 новых хворых на COVID-19 у Беларусі

Паводле Міністэрства аховы здароўя, на 11 траўня ў Беларусі:

• агулам 23 906 чалавек было са станоўчым тэстам на COVID-19 (у іх лік уваходзяць ачунялыя і памерлыя);
• 135 памерлых, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (родзічы некаторых памерлых кажуць, гэта ня так — паміралі і без хранічных хваробаў);
• 6531 пацыент паправіўся і выпісаны пасьля COVID-19;
• Гэта значыць, за дзень выявілі яшчэ 933 выпадкі і прызналі яшчэ 4 сьмерці, выпісалі 125 чалавек;
• ад пачатку эпідэміі ў краіне зрабілі 274 060 тэстаў (плюс 10 517 за дзень), цяпер тэсты робяць у 38 лябараторыях;
• колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляецца.

Беларускія лекары ананімна заяўляюць, што ня ўсім хворым ставяць адпаведны дыягназ, а мэдыкам бракуе сродкаў засьцярогі. У рытуальным агенцтве кажуць, што ў памерлых часьцей пазначаны дыягназ «неўдакладненая пнэўманія», а не «каранавірус». Міністэрства здароўя не залічвае да памерлых ад COVID-19 тых, у каго вірус «элімінавалі», а яны ўсё роўна памерлі.

Палескі драматычны тэатар сышоў у адпачынак

Ад 11 траўня ў Пінску не працуюць Палескі драматычны тэатар і гарадзкі кінатэатар «Перамога». З прычыны складанай санітарна-эпідэміялягічнай сытуацыі яшчэ ў красавіку тэатар адмяніў спэктаклі, а цяпер трупа сышла ў адпачынак. Кінатэатар закрылі на рамонт, піша «Радыё Рацыя».

«Белавія» адмяніла рэйсы ў Палангу, Жэнэву, Ніцу, Варонеж, Казань і Ніжні Ноўгарад

• 11 траўня авіякампанія «Белавія» паведаміла пра адмену рэйсаў зь Менску ў Палангу да 24 кастрычніка 2020 году.
• 10 траўня стала вядома, што з 10 траўня «Белавія» адмяняе рэйсы ў Ніцу, а з 18 траўня — у Жэнэву (да 24 кастрычніка 2020 году).
• 9 траўня «Белавія» адмяніла рэйсы зь Менску ў Воронеж, Казань і Ніжні Ноўгарад (таксама да 24 кастрычніка).

Беларускія «Зялёныя» таксама адмовіліся ўдзельнічаць у выбарах праз каранавірус

Беларуская партыя «Зялёныя» 11 траўня заявіла, што ня будзе ўдзельнічаць у прэзыдэнцкай кампаніі. «Зялёныя» лічаць, што дата выбараў зрушыла першую частку выбарчай кампаніі на пік пандэміі каранавірусу, а таксама «стварыла няроўныя ўмовы для кандыдатаў».

Партыя заяўляе, што «ўлады самаўхіліліся ад вырашэньня гэтай праблемы, не прапанаваўшы бясьпечны для чальцоў камандаў кандыдатаў і выбарнікаў спосаб кантакту падчас кампаніі».

Раней падобныя заявы рабілі партыі БНФ і «Справядлівы сьвет».

Кітайскія экспрэс-тэсты на антыцелы да SARS-CoV-2 ужо дастаўляюць у абласныя лякарні Беларусі

Паводле Міністэрства аховы здароўя, у Беларусь даставілі 100 тысяч экспрэс-тэстаў, якія дазволяць выявіць COVID-19 на позьніх этапах, а таксама высьветліць, ці чалавек ужо перахварэў (для выяўленьня хваробы на раньніх этапах гэты тып тэстаў не падыходзіць). Тэсты набылі на грошы з дабрачыннага рахунку міністэрства.

Першыя партыі ўжо даставілі ў Берасьцейскую, Гомельскую і Менскую вобласьці. 20 тысяч тэстаў даставяць у Менск, па 11 тысяч у Віцебскую і Берасьцейскую вобласьці, па 10 тысяч — у Гомельскую, Горадзенскую і Магілёўскую вобласьці, яшчэ 10 тысяч дадуць іншым установам сыстэмы Міністэрства здароўя.

На наступным тыдні экспрэс-тэсты абяцаюць прапанаваць ахвочым на платнай аснове, пакуль жа тэсты дастаўляюць толькі ва ўстановы аховы здароўя.

Купалаўскі тэатар абяцае хутка вярнуцца

Беларускі Нацыянальны акадэмічны тэатар імя Янкі Купалы «перайшоў у онлайн» — яшчэ ў красавіку тэатар адмяніў продаж квіткоў на спэктаклі і ладзіў паказы толькі на Youtube. Дата аднаўленьня спэктакляў у «офлайне» пакуль невядомая, але вядома, што ўсе спэктаклі адмяняюцца прынамсі да 17 траўня, некаторыя і ў пазьнейшыя даты.

Лічбы на раніцу 12 траўня

• У сьвеце зафіксавалі звыш 4,25 мільёна выпадкаў COVID-19: звыш 1,38 млн у ЗША, 268 тысяч у Гішпаніі, 223 тысячы ў Вялікай Брытаніі, 221 тысяча ў Расеі, амаль 220 тысяч у Італіі, каля 177,5 тысячы ў Францыі, 172,5 тысячы ў Нямеччыне, 169,5 тысячы ў Бразыліі, звыш 139,5 тысячы ў Турэччыне, 109 тысяч у Іране.
• Ад хваробаў, якія выклікаў новы каранавірус, у сьвеце прызнаныя сьмерці 287 336​ чалавек. Зь іх 81 795 у ЗША, 32 065 у Вялікай Брытаніі, 30 739 у Італіі, 26 744 у Гішпаніі, 26 643 у Францыі.
• Выпісалі звыш 1,52 мільёна пацыентаў, якіх вылекавалі ад COVID-19. «Актыўных выпадкаў» хваробы застаецца 2,44 млн, зь іх 47 тысяч у цяжкім ці крытычным стане.