Прататыпная вакцына абараняе малпаў ад каранавірусу
Прататыпная вакцына, распрацаваная навукоўцамі-вірусолягамі ў Бостане, абараняе малпаў ад каранавірусу, даючы надзею на стварэньне эфэктыўнай вакцыны для чалавека.
Пра гэта паведамляе The New York Times, спасылаючыся на дасьледаваньні, праведзеныя ў мэдычным цэнтры Beth Israel Deaconess у Бостане. Вынікі дасьледаваньняў былі апублікаваныя ў часопісе Science на гэтым тыдні.
Яшчэ 932 выпадкі і 5 сьмерцяў. Апублікавалі афіцыйную статыстыку COVID-19 у Беларусі на 22 траўня
Паводле Міністэрства аховы здароўя, на 22 траўня ў Беларусі:
- агулам 34 303 чалавекі са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 190 памерлых, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 12 833 пацыентаў паправіліся і выпісаныя пасьля COVID-19;
- гэта значыць, за дзень выявілі яшчэ 932 выпадкі і прызналі яшчэ 5 сьмерцяў, выпісалі 776 чалавек;
- ад пачатку эпідэміі ў краіне зрабілі 419 004 тэсты (рэкордныя 15 768 за дзень і рэкордна малы адсотак станоўчых тэстаў — 5,91%);
- колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляецца.
Амаль аднолькавая статыстыка — каля 918 новых выпадкаў COVID-19 і 4-5 прызнаных сьмерцяў — публікуецца штодзень ужо больш за тры тыдні. Беларускія лекары ананімна заяўляюць, што ня ўсім хворым ставяць адпаведны дыягназ. У рытуальным агенцтве кажуць, што ў памерлых часьцей пазначаны дыягназ «неўдакладненая пнэўманія». Міністэрства здароўя не залічвае да памерлых ад COVID-19 тых, у каго вірус «элімінавалі», а яны ўсё роўна памерлі.
У Расеі за суткі ад каранавірусу памерла найбольшая колькасьць людзей ад пачатку эпідэміі
У Расеі за мінулыя суткі ад каранавіруснай інфэкцыі памерлі 150 чалавек. Гэта самая вялікая колькасьць сьмерцяў за суткі ад пачатку эпідэміі. Усяго ў краіне ад COVID-19 паводле афіцыйных дадзеных памерлі 3249 чалавек.
За мінулыя суткі ў Расеі выяўлена 8894 новых выпадкаў — гэта на 45 чалавек больш, чым на суткі раней. Агульная колькасьць інфікаваных дасягнула 326 448 паведамляе апэратыўны штаб.
Паправіліся за суткі больш за 7 тысяч чалавек, агульная колькасьць ачунялых дасягнула амаль 100 тысяч.
Лічбы на раніцу 22 траўня
- У сьвеце зафіксавалі каля 5,2 мільёна выпадкаў COVID-19: 1,62 млн у ЗША, 317,5 тысячы ў Расеі, 310,9 тысячы ў Бразыліі, 280,1 тысячы ў Гішпаніі, каля 250,9 тысячы ў Вялікай Брытаніі, 228 тысяч у Італіі.
- Ад хваробаў, якія выклікаў новы каранавірус, у сьвеце прызнаныя сьмерці 334 675 чалавек. Зь іх 96 354 у ЗША, 36 042 у Вялікай Брытаніі, 32 486 у Італіі, 28 215 у Францыі, 27 940 у Гішпаніі, 20 082 у Бразыліі.
- Выпісалі 2,08 мільёна пацыентаў, якія паправіліся ад COVID-19. «Актыўных выпадкаў» хваробы застаецца каля 2,78 млн, зь іх каля 45,6 тысячы ў цяжкім ці крытычным стане.
У Грузіі ад 23 траўня адмяняюць надзвычайнае становішча і камэнданцкую гадзіну
Урад Грузіі вырашыў не працягваць надзвычайнае становішча і камэнданцкую гадзіну і скасаваў гэтыя абмежаваньні з 23 траўня, паведаміў прэм’ер-міністар Грузіі Георгій Гахарыя.
Грузія абвясьціла надзвычайнае становішча 21 сакавіка, таксама ў краіне да гэтага часу дзейнічае камэнданцкая гадзіна — з 21:00 да 06:00. Некаторы час быў забаронены ўезд і выезд з Тбілісі, Руставі, Батумі і Кутаісі, але на пачатку траўня абмежаваньні былі зьнятыя.
«МакДональдс» будзе дастаўляць бясплатныя абеды мэдыкам на працу
«МакДональдс» вырашыў дастаўляць абедныя наборы брыгадам хуткай дапамогі проста на працу, піша Tut.by. Напярэдадні менскім брыгадам хуткай дапамогі забаранілі заяжджаць у рэстаран у працоўны час.
У Віцебску, Гомлі, Берасьці і Магілёве акцыя пакуль праходзіць бязь зьменаў. Цалкам чытайце па спасылцы.
«Агідная хвароба» — 21-гадовы студэнт з добрым здароўем 5 тыдняў лячыўся ад каранавірусу
Студэнт Лінгвістычнага ўнівэрсытэту Іван, у якога не было ніякіх хранічных захворваньняў, праляжаў з каранавірусам у розных шпіталях агулам 5 тыдняў. Да пнэўманіі не дайшло, але дагэтуль хлопец ня чуе пахаў і смаку. Праз два тыдні зьбіраецца здаць плязму, каб дапамагчы іншым цяжка хворым на COVID-19.
У менскіх паліклініках зьявіліся экспрэс-тэсты на антыцелы да COVID-19. Вынік за 20 хвілінаў
Экспрэс-тэсты, якія зьявіліся ў паліклініках, не дазваляюць выявіць каранавірусную інфэкцыю на раньніх этапах, але выяўляюць тых, у каго хвароба на позьнім этапе, а таксама тых, хто ўжо перахварэў. Цяпер менскія клінікі робяць тэсты на антыцелы тых, хто паступіў для паўторнага абсьледаваньня як «кантакт І узроўню». Такіх пацыентаў цяпер пакідаюць лячыцца дома пад наглядам мэдыкаў.
Тэсты пакуль робяць толькі бясплатна і паводле мэдычных паказаньняў, платна і па жаданьні іх цяпер ня робяць. Цалкам чытайце тут.
Міністар Каранік адказаў на спрэчныя пытаньні аб даплатах мэдыкам за працу з хворымі на COVID-19
Міністар аховы здароўя Беларусі Ўладзімер Каранік 21 траўня пракамэнтаваў сытуацыю з выплатамі мэдыкам за працу з пацыентамі, інфікаванымі COVID-19. Паводле Караніка, пахвілінная даплата можа ісьці ў іншых краінах, у Беларусі ж даплочваюць за зьмены:
«Калі цягам зьмены мэдычны пэрсанал кантактаваў з пацыентам з каранавірусной інфэкцыяй, аплата ідзе за ўсю зьмену, — тлумачыў Каранік. — То бок, не за тыя хвіліны, паўгадзіны ці гадзіну, пакуль яны займаліся аказаньнем мэдычнай дапамогі. Калі такіх зьменаў цягам месяца было больш за 30%, аплата ідзе за ўвесь месяц — гэта значыць поўная аплата».
У такой схеме Каранік пабачыў «прынцып сацыяльнай справядлівасьці» і запэўніў, што ўсе, хто кантактаваў з пацыентамі, інфікаванымі COVID-19, атрымаюць даплату, за зьмены ці за месяц. Цалкам чытайце тут.
Дэзынфармацыі пра COVID-19 стала меней, — маніторынг ЭЗ
Дэзынфармацыя пра каранавірус зьменшылася «прынамсі часова», паведамляе Эўрапейская служба вонкавых дзеяньняў (EEAS) у аглядзе за 23 красавіка — 18 траўня. У той жа час пракрамлёўскія рэсурсы па-ранейшаму актыўна распаўсюджваюць недакладную інфармацыю пра пандэмію. Далей чытайце па спасылцы.
Плюс 945 інфікаваных і 6 памерлых. Апублікавалі афіцыйную статыстыку COVID-19 у Беларусі на 21 траўня
Міністэрства аховы здароўя Беларусі апублікавала 21 траўня ў сваім Telegram-канале новую афіцыйную статыстыку распаўсюду COVID-19:
- агулам 33 371 чалавек са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 185 памерлых, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 12 057 пацыентаў паправіліся і выпісаныя пасьля COVID-19;
- гэта значыць, за дзень выявілі яшчэ 945 выпадкаў і прызналі яшчэ 5 сьмерцяў, выпісалі 642 чалавек;
- ад пачатку эпідэміі ў краіне зрабілі 403 236 тэстаў (рэкордныя 15 563 за дзень і рэкордна малы адсотак станоўчых тэстаў — 6,07%);
Лукашэнка зрабіў новы прагноз: Беларусі яшчэ месяц прыйдзецца «важдацца» з каранавірусам
Аляксандар Лукашэнка прагназуе, што складаная сытуацыя з каранавірусам захаваецца ў краіне яшчэ месяц.
«Ні ў якім разе не расслабляцца. (...) Напэўна, пакуль мы канчаткова не адыдзем ад гэтага, месяц нам яшчэ давядзецца важдацца», — сказаў Лукашэнка на сустрэчы зь міністрам аховы здароўя Ўладзімірам Каранікам і памочнікам прэзыдэнта Аляксандрам Косінцам. Лукашэнку цытуе БелТА. Цалкам чытайце тут.
Міністэрства здароўя падлічыла ахвяраваньні на барацьбу з каранавірусам і расказала, на што іх патраціла
На барацьбу з распаўсюдам COVID-19 з дабрачынных рахункаў Рэспубліканскага цэнтру арганізацыі мэдычнага рэагаваньня пералічана 5 мільёнаў 499 тысяч рублёў.
Зь іх
- 4,6 млн рублёў пераведзена прадпрыемству «Белмэдтэхніка», у тым ліку 1 млн для набыцьця экспрэс-тэстаў на каранавірус.
- Рэспубліканскі навукова-практычны цэнтар эпідэміялёгіі і мікрабіялёгіі атрымаў 364 тысячы рублёў.
- РНПЦ трансфузіялёгіі і мэдычных біятэхналёгій — 102 тысячы.
- Нацыянальнаму антыдопінгаваму агенцтву выдзелена 350 тысяч рублёў.
Рэшта сродкаў на дабрачынных рахунках наступная: у беларускіх рублях — 211 051 рубля, у валюце — 171 339 эўра.
Праз каранавірус частку работнікаў БМЗ выправяць у водпуск на 2/3 акладу
Да канца чэрвеня работнікаў Беларускага мэталюргічнага заводу могуць адпраўляць у адпачынкі з захаваньнем 2/3 тарыфнага акладу. Прычына — «неспрыяльная сытуацыя, выкліканая ўвядзеньнем карантынных захадаў, у выніку чаго ўзьнік дысбалянс паміж пастаўкамі сыравіны і адгрузкай прадукцыі». На прадпрыемстве ўдакладнілі, што мера будзе прымяняцца кропкава, цяпер у такі адпачынак адправілі 3% работнікаў. Чытаць цалкам тут.
Швэцыя выйшла на першае месца ў сьвеце ў сьмяротнасьці ад COVID-19 на душу насельніцтва
У апошнія дні Швэцыя заняла першае месца ў сьвеце ў колькасьці сьмерцяў за апошнія сем дзён, выкліканых каранавірусам на мільён жыхароў.
Учора ў Швэцыі гэты каэфіцыент складаў 6,25, у другой краіне, Вялікай Брытаніі — 5,75. У краіне з насельніцтвам 10 мільёнаў чалавекаў колькасьць сьмерцяў ад COVID-19 набліжаецца да 4 000. Гэта лічбы з сэрвісу ourworldindata.org. Цалкам чытайце тут.
У ЗША праходзіць 24-гадзінная онлайн-жалоба па памерлых ад COVID-19
У ЗША ў чацьвер, 21 траўня, праходзіць онлайн-акцыя, падчас якой зачытваюцца імёны, узрост і месца пражываньня людзей, якія памерлі ў выніку заражэньня каранавірусам SARS-CoV-2. 24-гадзінная акцыя «Назваць імёны памерлых» (#namingthelost) пачалася напярэдадні, у яе рамках усе жыхары ЗША могуць даслаць імёны сваіх блізкіх, якія памерлі з прычыны выкліканай каранавірусам пнэўманіі COVID-19. Онлайн-жалобу арганізавала група людзей, якія самі праз пандэмію каранавірусу страцілі родных, сяброў, калег або суседзяў. Яны пражываюць у розных штатах ЗША, у тым ліку тых, што найбольш пацярпелі ад пандэміі.
У Берасьці зрабілі стрыт-арт з крытыкай Міністэрства здароўя. Зафарбавалі ў той жа дзень
Удзень 20 траўня на сьцяне нежылога будынка на вуліцы Інтэрнацыянальнай у Берасьці зьявіўся малюнак з трыма малпамі і лягатыпам Міністэрства аховы здароўя Беларусі. Як піша Tut.by, выяву зафарбавалі ўжо вечарам таго ж дня.
Аўтар муралу невядомы, тлумачэньняў да яго на сьцяне не было. Але вобраз трох малпаў прыйшоў зь Японіі (三猿), звычайна расшыфроўваецца фразай «калі я ня бачу зла, ня чую пра зло і нічога не кажу пра яго, то я абаронены ад яго».
Подпісы пад малпамі — Ігар Карпаў (галоўны няштатны інфэкцыяніст Міністэрства аховы здароўя, прафэсар), Уладзімер Каранік (міністар аховы здароўя), Ірына Глінская (намесьніца галоўнага доктара Беларускага цэнтру гігіены і эпідэміялёгіі).
Кампазыцыя нагадвае тое, як выглядалі прэс-канфэрэнцыі Міністэрства аховы здароўя: звычайна тры чалавекі сядзелі перад мікрафонамі, за імі на сьцяне быў лягатып установы. Апошні раз на пытаньні незалежных СМІ прадстаўнікі міністэрства адказвалі на такой прэс-канфэрэнцыі 17 красавіка, пасьля 24 красавіка правялі толькі брыфінг, на якім не далі журналістам задаць пытаньні.
«Захавалі бясьпеку, ня страцілі час». Як прыватная школа ў Віцебску другі месяц працуе онлайн
Першая ў Віцебску прыватная школа «Апэльсін» дзейнічае пры адукацыйным цэнтры «100 балаў — Віцебск». Школа і цэнтар дзеляць адно памяшканьне ў цэнтры гораду. У першай палове дня з панядзелка па пятніцу тут займаюцца школьнікі, пасьля 15-й — вучні адукацыйнага цэнтру, для якіх субота і нядзеля таксама «працоўныя».
Сёлета для школы першы навучальны год. Пачынаўся ён офлайн, праз эпідэміялягічную сытуацыю ў краіне завершыцца онлайн. Да пераходу на дыстанцыйнае навучаньне тут пачалі рыхтавацца яшчэ зімой.
На фоне пандэміі тры з шасьці аблвыканкамаў зьнізілі стаўкі адзінага падатку
У Берасьцейскай і Горадзенскай абласьцях удвая зьніжаныя стаўкі адзінага падатку для індывідуальных прадпрымальнікаў і фізычных асобаў. Як удакладняецца на Нацынальным прававым інтэрнэт-партале, паменшаныя стаўкі будуць дзейнічаць у 2-м і 3-м кварталах гэтага году.
Новыя нормы набылі сілу пасьля афіцыйнага апублікаваньня і распаўсюджваюць сваё дзеяньне на адносіны, якія ўзьніклі ад 1 красавіка 2020 году. Раней Віцебскі аблвыканкам таксама зьнізіў стаўкі адзінага падатку для індывідуальных прадпрымальнікаў і фізычных асобаў.
Лічбы на 21 траўня
- У сьвеце зафіксавалі каля 5,09 мільёна выпадкаў COVID-19: 1,59 млн у ЗША, 308,7 тысячы ў Расеі, 293,4 тысячы ў Бразыліі, амаль 279,5 тысячы ў Гішпаніі, каля 248,3 тысячы ў Вялікай Брытаніі, 227,4 тысячы ў Італіі.
- Ад хваробаў, якія выклікаў новы каранавірус, у сьвеце прызнаныя сьмерці 329 732 чалавек. Зь іх 94 941 у ЗША, 35 704 у Вялікай Брытаніі, 32 330 у Італіі, 28 132 у Францыі, 27 888 у Гішпаніі, 18 894 у Бразыліі.
- Выпісалі 2,02 мільёна пацыентаў, якіх вылекавалі ад COVID-19. «Актыўных выпадкаў» хваробы застаецца каля 2,7 млн, зь іх каля 45,8 тысячы ў цяжкім ці крытычным стане.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў