Лічбы на раніцу 10 красавіка
- У сьвеце зафіксавалі звыш 1,6 мільёна выпадкаў COVID-19: 469 тысяч у ЗША, 153 тысячы ў Гішпаніі, 143 тысячы ў Італіі, па 118 тысяч у Нямеччыне і Францыі, каля 83 тысяч у Кітаі, больш за 66 тысяч у Іране, 65 тысяч у Вялікай Брытаніі, больш за 42 тысячы ў Турэччыне.
- Ад хваробаў, якія выклікаў новы каранавірус, у сьвеце памерлі 95 739 чалавек. Зь іх 18 279 у Італіі, 16 697 у ЗША, 15 447 у Гішпаніі, 12 210 у Францыі, 7 978 у Вялікай Брытаніі, 4 110 у Іране, 3 340 у Кітаі.
- Выпісалі 357 тысяч пацыентаў, якіх вылекавалі ад COVID-19. «Актыўных выпадкаў» хваробы застаецца больш за 1,152 млн, зь іх 49 тысяч у цяжкім стане.
- У Беларусі, паводле афіцыйных зьвестак на 9 красавіка, пацьверджаныя 1486 выпадкаў COVID-19, памерлі 16 чалавек, выпісаныя здаровымі 139 пацыентаў. Лекары ананімна заяўляюць, што ня ўсім хворым ставяць адпаведны дыягназ.
Чаму валянтэры БРСМ надзелі маскі
У канцы сакавіка Беларускі рэспубліканскі саюз моладзі заклікаў у сваёй суполцы «Ўкантакце» захоўваць спакой і не паддавацца ніякай паніцы, калі «ўсясьветныя СМІ расказваюць пра ажыятаж у чэргах». Таксама БРСМ патлумачыў сваю пазыцыю супраць нашэньня масак.
Маўляў, «некаторыя людзі, асабліва чытачы палітызаваных апазыцыйных паблікаў, надзяваюць мэдычныя маскі на твары ня дзеля клопату пра здароўе, а з пачуцьця пазэрства, лішні раз дэманструючы такім чынам сваю «асаблівую пазыцыю».
Пасьля гэтага камэнтару прайшло больш за два тыдні. Ці памянялася стаўленьне БРСМ да масак?
«Ісьці ў храм ці не — справа сумленьня кожнага». Што сьвятары ў правінцыі кажуць людзям перад вялікімі сьвятамі
У Беларусі штодня павялічваецца колькасьць выпадкаў заражэньня каранавірусам, але ўлады адмовіліся ад усеагульнага карантыну. Кіраўніцтва каталіцкай царквы ў Беларусі заклікала вернікаў адсьвяткаваць Вялікдзень дома. Беларуская праваслаўная царква Маскоўскага патрыярхату абмежавалася правіламі прафіляктыкі каранавірусу. Аб’яднаная царква хрысьціянаў веры Эвангельскай у Беларусі (пратэстанты) таксама не выказвалася пра захады дыстанцыяваньня перад сьвятамі. А што кажуць вернікам сьвятары розных канфэсій у невялікіх гарадах і мястэчках?
Напярэдадні вялікіх рэлігійных сьвятаў — Вялікадня ў каталікоў і пратэстантаў і Вербніцы ў праваслаўных — Свабода пацікавілася ў сьвятароў у розных рэгіёнах Беларусі, што яны кажуць вернікам у сувязі з эпідэміяй каранавірусу. Чытайце па спасылцы >>
У інтэрнаце БНТУ зноў ўвялі карантын праз студэнтку, хворую на каранавірус
У інтэрнаце № 6 БНТУ ўвялі карантын, пасьля таго як у адной са студэнтак выявілі каранавірус. У рэктараце сьцьвярджаюць, што дзяўчыну ўжо забрала хуткая. Аднак, паводле самой студэнткі і іншых студэнтаў, дзяўчына знаходзіцца ў інтэрнаце ад моманту, калі ў яе выявілі каранавірус, піша Onliner.by.
Ад 9 красавіка студэнтаў будуць выпускаць з інтэрнату на 20 хвілін у бліжэйшую краму.
Студэнтка адчула нядужасьць і тэмпэратуру ў канцы лютага, калі ў інтэрнаце першы раз увялі карантын. Усім студэнтам мералі тэмпэратуру, але адносна яе мэдычныя супрацоўнікі не прымалі мераў. 10 сакавіка карантын у БНТУ скончыўся і студэнтаў вярнулі на заняткі. Тэмпэратура ў дзяўчыны пэрыядычна ўздымалася на 37,6 – 38,2 градуса.
Паводле дзяўчыны даведку з вызваленьнем ад вучобы ёй адчынілі ў канцы сакавіка. Маці студэнткі настаяла, каб дзяўчыне зрабілі тэст на COVID-19, ён аказаўся станоўчы.
«Маіх знаёмых мэдыкаў хварэе каля 10 чалавек». Беларускі лекар з каранавірусам расказвае пра хваробу
«У адзін цудоўны дзень пасьля зьмены адчуў сябе нядобра, — расказвае доктар аднаго зь віцебскіх шпіталяў, які захварэў на каранавірус. Лекар ляжыць у шпіталі каля 10 дзён і кажа, што ня ведае, колькі ўсяго мэдыкаў хварэе, але «канкрэтна маіх знаёмых каля 10 чалавек».
Ён паўтарае парады, якія даўно гучаць адусюль: па магчымасьці пазьбягаць масавых месцаў, захоўваць дыстанцыю ў крамах і мыць рукі. Пра агульную сытуацыю з каранавірусам доктар кажа, што яна «канечне, ня вельмі». Інтэрвію цалкам тут >>
Зь фільму жахаў. Кардонныя труны і непрыбраныя целы на вуліцах
«Гэта падобна на сюжэт фільму жахаў, а шпіталі — на зону ваенных дзеяньняў». Так мясцовыя і замежныя лекары, якія працуюць у Эквадоры, апісваюць наступствы эпідэміі COVID-19 у Гуаякілі, найбуйнейшым горадзе краіны. Усе дзяржавы спраўляюцца з крызісам вельмі па-рознаму. На лацінаамэрыканскім кантынэнце невялікі 16-мільённы Эквадор апынуўся ў ліку найбольш пацярпелых.
Відэа і фатаграфіі, якія апошнімі днямі паступаюць з Гуаякілю, насельніцтва якога складае амаль 2 мільёны 300 тысячаў чалавек, нават на фоне ўсіх астатніх змрочных навін, зьвязаных з пандэміяй, вылучаюцца скрайняй безвыходнасьцю. Падрабязна чытайце тут (+ фота) >>
17 ці 41 інфікаваных каранавірусам на Берасьцейшчыне? Статыстыка Мінздароўя і аблвыканкаму не супадае
У Берасьцейскай вобласьці каранавірус пацьверджаны ў 41 чалавека, больш за ўсё ў Лунінецкім раёне — 26 чалавек, а таксама ў Берасьці — 6 чалавек, заявіў 9 красавіка старшыня Берасьцейскага аблвыканкаму Анатоль Ліс, якога цытуе sb.by. Паведамленьне пра гэта зьявілася каля 13-й гадзіны дня.
На афіцыйным сайце stopcovid.belta.by, які Міністэрства аховы здароўя рэкамэндавала як афіцыйную крыніцу апэратыўнай інфармацыі, паводле стану на 6 гадзін раніцы 9 красавіка ў бальніцах Берасьцейскай вобласьці знаходзіліся 17 хворых на COVID-19. Колькасьць хворых, паводле Мінздароўя і паводле Берасьцейскага аблвыканкаму, адрозьніваецца ў 2,4 раза.
Паводле ўчорашняй статыстыкі за 8 красавіка Берасьцейскага абласнога цэнтру гігіены, эпідэміялёгіі і грамадзкага здароўя, каранавірус у вобласьці пацьвердзілі ў 28 чалавек, тым часам як афіцыйная статыстыка пацьвярджала толькі 3 выпадкі.
Міністар аховы здароўя растлумачыў, чаму ў Беларусі не прынялі стратэгію стрымліваньня каранавірусу
Міністар аховы здароўя Беларусі Ўладзімер Каранік расказаў, чаму ў Беларусі абралі «стратэгію зьмякчэньня наступстваў» каранавірусу замест «стратэгіі стрымліваньня». Паводле Караніка, краіны «пэрыядычна пераходзяць з адной стратэгіі на другую або мяняюць яе ў працэсе прапрацоўкі», але «стратэгіі стрымліваньня» цяпер не прытрымліваюцца толькі дзьве краіны Эўропы: Беларусь і Швэцыя.
«Стратэгія стрымліваньня» накіраваная на «татальнае разлучэньне людзей», сказаў Каранік, і выкарыстоўваецца, каб запаволіць распаўсюд інфэкцыі і даць сыстэме аховы здароўя «прайсьці перагрузку» і вярнуцца ў рабочы стан. Калі захады «татальнага разлучэньня» здымаюцца, рост колькасьці хворых аднаўляецца, пераконвае ён. «Стратэгія зьмякчэньня» ж нацэленая на тое, каб не дапусьціць экспанэнцыйнага росту колькасьці хворых, трымаць яе ў межах «рэсурсных магчымасьцей сыстэмы аказаць дапамогу». Адпаведна, сваёй задачай Мінздароўя бачыць, сярод іншага, недапушчэньне лявінападобнага росту колькасьці хворых.
Сусьветны банк: У сувязі з пандэміяй беларуская эканоміка ў 2020 годзе скароціцца на 4%
Такі прагноз прыводзіцца ў дакладзе Сусьветнага банку пра ўплыў каранавірусу на эканоміку краін Эўропы і Цэнтральнай Азіію «Чакаецца, што ў 2020 годзе эканоміка Беларусі скароціцца на 4%, бо глябальны эканамічны спад, выкліканы каранавірусам, зьнізіць попыт на беларускі экспарт сыравінных тавараў і тавараў, якія пастаўляюцца ў краіны Эўразьвязу, Расеі і на іншыя рынкі», — гаворыцца ў дакладзе. Цалкам чытаць тут >>
У Воршы — першая сьмерць ад каранавірусу
У Аршанскім раёне зарэгістравалі першую сьмерць пацыента з каранавірусам. Пра гэта стала вядома 9 красавіка. У памерлага «шматлікія хранічныя захворваньні былі абцяжараныя каранавіруснай інфэкцыяй», паведаміў «Аршанскай газеце» галоўны дзяржаўны санітарны лекар Аршанскага раёну Сяргей Белы.
Пра наяўнасьць хворых на COVID-19 паведамілі 9 раёнаў Віцебскай вобласьці, пішуць «Народныя навіны Віцебска» з спасылкай на раённыя газэты:
- Аршанскі,
- Бешанковіцкі,
- Віцебскі,
- Гарадоцкі,
- Докшыцкі,
- Пастаўскі,
- Полацкі,
- Ушацкі,
- Шумілінскі.
Польшча пашырыла абмежаваньні на грамадзкае жыцьцё, каб стрымаць каранавірус
Польскія межы застануцца закрытымі да 3 траўня, урад падоўжыць тэрмін закрыцьця школ і прадпрыемстваў, заявіў у чацьвер прэм’ер-міністар Польшчы Матэвуш Маравецкі.
Прадпрыемствы застануцца закрытымі да 19 красавіка, а абмежаваньні на дзейнасьць школ, а таксама на рух чыгуначнага і паветранага транспарту будуць падоўжаныя яшчэ на два тыдні, сказаў ён.
Для жыхароў Польшчы таксама ўвялі абавязковае нашэньне масак, якія б закрывалі рот і нос, пачынаючы ад чацьвярга наступнага тыдня, і тады ўрад таксама мае апублікаваць графік «вяртаньня да новай эканамічнай рэальнасьці».
У супрацоўнікаў Нацыянальнай бібліятэкі знайшлі каранавірус
У супрацоўнікаў Нацыянальнай бібліятэкі знайшлі каранавірусУ двух супрацоўнікаў унутраных дэпартамэнтаў Нацыянальнай бібліятэкі выявілі каранавірус, піша Tut.by. Хворыя і калегі, якія зь імі кантактавалі, знаходзяцца на карантыне. Паведамляецца, што хворыя і кантактныя супрацоўнікі бібліятэкі ня мелі зносін з чытачамі.
Нацыянальная бібліятэка часова закрыла чытальныя залі, частка інфармацыі даступная онлайн.
«Гэтыя супрацоўнікі ня ходзяць на працу, акрамя таго, памяшканьні, у якіх яны працавалі, зараз на карантыне і ўсе супрацоўнікі, якія зь імі кантактавалі, зараз таксама не знаходзяцца на працы. Мы дзейнічаем паводле патрабаваньняў, якія прапісала Мінздароўя, каб вірус не распаўсюджваўся», — сказала першы намесьнікі генэральнага дырэктара Нацыянальнай бібліятэкі Алена Далгаполава.
Толькі адзін дэпутат Палаты прадстаўнікоў надзеў маску на сэсію. ФАТАФАКТ
На паседжаньні Палаты прадстаўнікоў дэпутаты сядзяць ня парамі, як звычайна, а па адным, але маску носіць толькі адзін дэпутат са 110 — 55-гадовы журналіст Тэнгіз Думбадзэ, заўважае Office.life. На паседжаньні ён расказаў, што за апошні дзень заразіліся 20–30 мэдыкаў, адзначыў нізкія (25–30 рублёў) даплаты мэдыкам за працу, зьвязаную з каранавірусам.
Беларускі турбізнэс просіць падтрымкі ўраду ва ўмовах пандэміі. 6 прапаноў
Міністэрства спорту і турызму разам з Рэспубліканскімі саюзамі турыстычнай індустрыі і турыстычных арганізацый стварылі працоўную групу, якая падтрымае галіну ў складаны пэрыяд. Пакет прапановаў ужо накіраваны ва ўрад.
Паводле кіраўніцы рады Рэспубліканскага саюзу турыстычных арганізацый Аксаны Бічун, сярод прапанаваных антыкрызісных захадаў:
- адтэрміноўка абавязаньняў па раней заключаных дамовах з кліентамі,
- зьніжэньне з 20% да 10% ПДВ для гатэляў,
- абмежаваньне камісіі банкаў,
- паслабленьні па арэнднай плаце,
- падатковыя вакацыі на 6 месяцаў на ўсе віды падаткаў
- мараторый да 31 сьнежня на прыняцьце падатковымі органамі рашэньняў аб арышце рахункаў суб’ектаў галіны.
Каранавірус: у менскім СІЗА сустрэчы з адвакатамі перавялі на рэжым «праз шкло»
У СІЗА нумар 1 на вуліцы Валадарскага ў Менску, дзе трымаюць некалькі дзясяткаў падазраваных у злачынствах і падсудных, усе сустрэчы адвакатаў зь іх кліентамі цяпер адбываюцца толькі праз шкло з выкарыстаньнем тэлефонных слухавак.
«Гэта прынята ў сувязі з каранавірусам», — сказаў карэспандэнту Свабоды дзяжурны СІЗА. Больш атрымаць інфармацыі пра захады, прынятыя ў СІЗА ў сувязі з пандэміяй COVID-19, не ўдалося.
«Ён дыхае кіслародам, стан сярэдняй цяжкасьці». Як пачуваецца муж першай менскай ахвяры каранавірусу
У 65-гадовага Яўгена Дзеравянкі, мужа першай ахвяры каранавірусу ў Менску Вольгі Дзеравянкі, таксама пацьвердзілі каранавірус.
«Ён дыхае кіслародам; як і ва ўсіх, стан сярэдняй цяжкасьці. Яго перавялі ўжо ў 6-ю лякарню. Спадзяемся, што ён паправіцца, кіслароду яму хапае, ён даволі моцны і без хранічных захворваньняў. Перад гэтым тэлефанаваў, дык голас быў хрыплы. Пакуль стараемся яго не турбаваць. Будзем спадзявацца на лепшае», — сказаў Мікалай. Цалкам чытайце па спасылцы >>
Лукашэнка: На пажарах у разы больш гіне, чым ад каранавірусу
Паводле Лукашэнкі, на пажарах «у разы больш гіне», чым ад каранавірусу.
Лукашэнка паўтарыў, што ў барацьбе з каранавірусам «для нас найважнейшы элемэнт — гэта эканоміка», а каранавірус — «усё гэта сыдзе, яно ўжо сыходзіць, вы бачыце, у Эўропе што адбываецца». Цалкам чытайце тут >>
Італія зьбіраецца зьняць некаторыя абмежаваньні ў красавіку
Прэм’ер-міністар Італіі Джузэпэ Контэ заявіў, што ў канцы красавіка Італія можа пачаць паступова здымаць некаторыя абмежаваньні, уведзеныя для спыненьня эпідэміі COVID-19. 9 сакавіка Італія ўвяла агульнанацыянальную забарону на грамадзкія кантакты. Праз два тыдні Контэ абвясьціў, што менш важныя прадпрыемствы, уключаючы вытворчасьць аўтамабіляў, адзеньня і мэблі, павінны спыніцца.
Агульная колькасьць заражаных каранавірусам людзей у Італіі складае амаль 140 тысяч; колькасьць сьмерцаў ад пандэміі — амаль 18 тысяч.
Прадстаўнік WHO заклікаў Беларусь разгледзець больш жорсткія віды дыстанцыяваньня — аж да карантыну
Прадстаўнік Сусьветнай арганізацыі здароўя ў Беларусі Батыр Бердыклычаў адзначыў, што з 30-31 сакавіка ў Беларусі ідзе рэзкі рост захваральнасьці, і заявіў, што ў краіне важна прыняць больш жорсткія меры сацыяльнага дыстанцыяваньня ў сувязі з пандэміяй каранавірусу да наступленьня піку захворваньняў: перавод на дыстанцыйнае навучаньне, забарона масавых мерапрыемстваў, аж да ўвядзеньня карантыну, паведамляе Tut.by.
«Калі глядзець на досьвед краін, якія прайшлі гэты шлях, з 4-6-га тыдня ідзе экспанэнтны рост выпадкаў. А да 8-га тыдня падыходзяць да піку. Для Беларусі гэта наступны этап. Гэта этап не завезеных выпадкаў, а перадачы сярод мясцовага насельніцтва. Чакаем далейшага росту», — сказаў ён.