Лінкі ўнівэрсальнага доступу

Жыхароў Калінінграду абвінавацілі ў дзяржаўнай здрадзе за здымкі свайго вясельля


Антаніна Зіміна

Фэдэральная служба бясьпекі Расеі завяршыла расьсьледаваньне справы ў дачыненьні да дваіх жыхароў Калінінграду, западозраных у дзяржаўнай здрадзе. Спэцслужба абвінавачвае сужэнцаў Антаніну Зіміну і Канстанціна Антанца ў раскрыцьці асобы свайго дзейнага супрацоўніка.

Паводле зьвестак газэты «Коммерсантъ», сутнасьць справы заключаецца ў тым, што чэкіст быў запрошаны на вясельле, фота і відэа зь якога трапілі ў сацсетку.

Дырэктар Балтыйскага цэнтру дыялёгу культур Антаніна Зіміна і яе муж былі арыштаваныя ў ліпені 2018 году. Сутнасьць абвінавачаньняў сьледзтвам публічна не раскрывалася. Паводле газэты, мужа і жонку абвінавачваюць у тым, што відэа і фатаграфіі зь іх вясельля трапілі на вочы спэцслужбам Латвіі, а тыя змаглі апазнаць на іх дзейнага супрацоўніка ФСБ, які займаецца контрвыведкай.

Сваякі абвінавачаных успамінаюць, што выведнік некалі вучыўся разам зь Зіміной ў Балтыйскім унівэрсытэце. Выпіўшы за вясельным сталом, ён раздаваў гасьцям свае візытоўкі, фатаграфаваўся зь імі і распавядаў пра сваю працу. Пазьней гэтыя матэрыялы трапілі ў эфір неназванага балтыйскага тэлеканалу.

Зіміна і Антанец сваёй віны не прызнаюць, доступу да дзяржаўнай таямніцы яны ня мелі. Жанчына зь ліпеня 2018 году ўтрымліваецца ў СІЗА «Лефортава» ў Маскве, дзе яе паставілі на ўлік як схільную да ўцёкаў за нязначныя парушэньні рэжыму.

Паводле артыкулу абвінавачаньня сужэнцам пагражае да 20 гадоў пазбаўленьня волі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG